Barca tan hliam tuam dam a hun

Nipui transfer-ah leiba tam tak nei chungin, an club thil neih leh 'hma hun' an hralh a, an sum tuak ngah hmangin player hrawl pui pui an lei a, mahse, Barcelona chan tawk chu Champions League group stage aṭanga tlak a ni.

Catalan club hi an tla a ni satliah lo a, mualpho takin an tla - group C-ah Bayern Munich, Inter Milan leh Viktoria Plzen te nen an awm ho a, 'group of death' hming lem hial pek ni mah se Bayern an vawk lal len a, Inter-in an hnung an zui a, Barca leh Viktoria chu club lian pahnih tan a tikimtu, a 'chhawṭani' mai an chang.

Xavi enkawl team hian match hmasa berah Viktoria chu 5-1 zetin sawp mah se a hnuah chak an nei leh tawh lo - Bayern Munich nen an intawn vawi hnihah an tlawm ve ve a, Inter nen an intawn vawi hnihah vawi khat an tlawm a, vawi khat an inhnehtawkpui!

Barcelona squad en ila, Jules Koundé, Pedri, Frenkie de Jong, Gavi, Ousmane Dembélé, Robert Lewandowski, Ansu Fati, Ferran Torres leh Raphinha te ho an ther fur a, mahse, Xavi-a'n Champions League knockout round a luhpui zo tlat lo.

A mak a na
Barca-in an tla tih an hriat khan match hnih khelh tur an la nei a, Bayern lakah 3-0 in an mualpho zui. Risk la a, sum tam tak senga indinthar tum club hi Spanish media-ten an dim duh bik lo a, 'Hlawhchhamna', 'Hremna' tihte leh 'Zan lungngaihthlak' tihte chu an chanchinbua Barca chungchang an ziah duh dan a ni.

Mahse, Catalan club chunga rinna la nghat tlat pakhat a awm a, a hming chu Xavi a ni. Spanish coach hian, "Inelna hmachhawn tur dang kan la nei alawm. Champions League aṭanga tlak hi a hrehawm a, mahse, heng nomawite chawi thei tur hian kan inenfiah a ṭul a ni," a ti.

Xavi sawi angin Barca tan khua a la thim vek bik lo - La Liga-ah match 11 khel tawhin vawi khat chiah an la tlawm a, point 28 neiin hmahruaitu Real Madrid chu point thum chauhin an phak lo mek.

Zanin dar 12:30-ah Catalan club hian Valencia an lenchilh zui dawn a, fan-te thinlung na thawi dam nan chak an mamawh - an chak zo lo a nih ngat chuan Xavi ban duhna thawm a ri ṭan tawh hial ang.

A tak ram
Barca boss Xavi chuan, "Hei hi a tak ram chu a ni a, kan hmachhawn a ngai a ni. Hmasawn zel turin hetianga harsatna tawh hi kan mamawh a ni mai thei asin. Mahse, kan Champions League chu a tawp tawh a, engmah a thlak theih tawh lo.

"A hma kan match hoah tihsual kan neih ṭhin avangin tun dinhmunah hian kan ding a, tlarhmaah kan hriam tawk lo a ni," a ti - Barca tan tun season-ah Lewandowski chuan goal 17 ngawt a khung tawh a, mahse, player dang zingah goal nga khung tling an la awm lo a nih chu!

A tawi zawnga sawi chuan, Lewy ke hmui loh zanah Barca tana a hmun ruak luah tur an awm lo a, Ballon d'Or dawn châka Catalan club pantu hi hun rei tak Barca phurrit lo phur tawhtu Lionel Messi hmun ruakah a hawihai mek e.

Catalan club tan inenfiahna tur langsar tak pakhat chu club lian an ngam lo hi a ni - Champions League-a Bayern leh Inter an hmachhawnah chak an nei ve miah lo a, an chet ṭhatna La Liga-ah pawh team lian tia chhal theihah Real Madrid chiah an la hmachhawn a, an tlawm bawk!

Nghak hram ula
Barca-in nipui laia an leiba neih zat kha pound tluklehdingawn khat vel a ni a, mahse, heti chung hian 'economic lever' an tih chu hmang ṭangkaiin, Barca Studios share ṭhenkhat leh, television rights ṭhenkhat an hralh 'lawk' a, player lakluh nan pound tluklehdingawn 200 dawn an seng.

Mi tam takin 'risk' la huai, Barca president Joan Laporta an fak a, ṭhenkhatin hlauhthawnna nen an thlir a, a ṭhen an lungawi lo thung - club khat chhungkuaah pawh ngaihdan a inang lo a, vawi khat chetsuala in kawk turin ṭhenkhat kut zungṭang chu a inpeih reng.

Tunah Barca an chesual ta. Mahse, Laporta-a'n bihruk a tum lo a, Catalan club hotupa chuan, "Bul kan ṭan thar ve chauh a ni a, a tir aṭang khan tluk leh din chang kan nei dawn tih hi chu kan hriatsa a ni," a ti a, an dinhmun chu club indinthar tir tana thil awm tak a nih thu a sawi.

Mahse, Barca-in club television rights kum 25 chhung meuh atana an lo hralh lawk ngamna chhan langsar chu khelmuala chet ṭhat a, sum tam zawk lakluh zel an beisei vang a ni pakhat - tun season-ah chuan a thleng ta lo phawt!

A nghawng tur
Kum 19 mi Pedri-a'n Champions League an khelh chhunzawm lo tur a la na fal a, Spanish player ṭhangduang tak chuan, "Ka tan chuan hlawhchhamna a ni a, Champions League-a awm kan phu lo a ni," a ti tawl mai.

Barca-in nipui transfer-ah sum tam tak sengin team an indinthar a, free transfer-a player an lakluhte nen phei chuan player hlawha an insen ral ringawt pawh a tam tham hle - mahse, Champions League group stage chu an tawpna a ni tlat.

Catalan club hian European club football inelna sang ber an khelh avanga broadcasting rights aṭanga an sum hmuh tur chu an chân nual dawn tih a chiang a, an sum lakluh leh sen ral inmil loh avangin an la talbuai thei.

Chumiin a hrinchhuah tur chu January transfer-a bazar miah loh leh, player-te hlawh tihniam tura ngen a ni dawn. Mahse, he buaina zawng zawng hi hliahkhuh theih dan a awm a, chu chu La Liga champion nih a ni!

Chhantu Real
La Liga team zingah Real Madrid chu Champions League last 16 lut awmchhun an ni - Barca bakah Sevilla leh Atletico Madrid-ten knockout round an inpetkai zo lo a, Spanish football a mualpho hle.

Atletico Madrid boss Diego Simeone chuan, "Champions League hi ka tan chuan a nunrawng a ni. Final vawi hnih kan tlawm a, vawi khat penalty-ah niin, vawi khat minute 93-naah goal kan chhuah. Mahse, chutianga lunghnur mai chi erawh ka ni lo.

"Hun ka neih chhung chuan Champions League khel turin theihtawp ka chhuah zel ang a, kan ṭhat tawk lohna hmuhchhuah ka tum ang," a ti. Atletico hian 2014 final-ah khan minute 93-naah goal chhuahin, extra time-ah an chak lo zui a, 2016-ah penalty-ah an tlawm bawk - final pahnihah hian an ngam loh chu Real Madrid an ni.

Madrid khaw club hian zanin dar 7:45-ah league match khel turin Cadiz an lenchilh dawn a, hmahruaitu Real Madrid chuan Pathianni zan dar 8:45-ah Girona an mikhual ang.