Chawl hman ka ni lo - Bagnaia

MotoGP rider championship hmahruaitu, champion tura dinhmun ṭha taka ding lai Francesco Bagnaia chuan chawl hman a nih loh thu a sawi. November 6, Pathianni hian Valencian Grand Prix an tlan dawn, engkim chinfel a ni ang.

Italian rider Bagnaia chuan, "Inelna a la zo lo, chesual thei ka la ni tih ka hria. Champion ka la ni miau lo a, chuvangin chawl hman ka la ni lo, tun kar tawp erawh taksa hahchawlhna hun a ni dawn. Kar tharah chuan nasa lehzual zawkin ka inbuatsaih dawn," tiin a sawi.

Ducati rider hian champion turin hna hautak a nei tawh lo, 15-na chin a nih chuan a champion thei dawn. Point khat lek pawh a hmuh belh a nih chuan a champion thei dawn tihna a ni a, chesual loa tlan tluan a pawimawh ang.

Mahse, a sawi tak ang khian inelna a la tawp lo. Bagnaia hi chesualin point hmuh belh lo a, pahnihna ni lai Fabio Quartararo a chak a nih si chuan Yamaha rider hi a la champion leh zawk daih thei, intlansiak a zawh hma chuan engmah sawi lawk theih a la ni lo.