Harh ngai Arsenal

Europe League group hmahruaitu ni turin Arsenal tan chak a pawimawh, mahse PSV Eindhoven mualah 2-0 in an tlawm. Inkelh banah Mikel Arteta chuan inthinharh an mamawh tih a sawi.

Arteta-a'n group hmahruaitu nih ngei a duh a, chak a duh vangin a tir aṭangin player ṭha pawh a chhawr nual, khualmuala inkhel ni mah se a tir aṭangin inkhel pawh an thunun angreng viau.

Mahse, Gabriel Jesus aia lut Eddie Nketiah a hlauhawm tawk lo, ball chang tam zawk ni mah se English club hian a hmawr an bawk thei lo, chawlhlawk hma deuha PSV goal khung chu VAR hmangin an hnawl hlauh.

Second half-ah PSV an hlauhawm, goal chhuah thei an ni tih hriain Arteta-a'n game thlak danglam a tum, midfielder Thomas Partey dah luh a tum lai takin Joey Veerman chuan PSV tan chiang zetin a khung.

Partey bakah Bukayo Saka dah luh tel a ni a, captain Martin Oegaard leh Sambi Lokonga te an chhuak thung, awmzia erawh a nei thui lo - goal an chhuah leh nghal.

Aaron Ramsdale-a'n a chhut sual a, a ball zuan a khawih phak lo. Luuk de Jong chuan chiang zetin a tauh lut daih. Ben White leh Gabriel te an luh hnuah an tlarhnung phui ta deuh mah se awmzia a nei phak tawh lo.

Group hmahruaitu hian last 16 an lut nghal dawn, pahnihna erawh tlang tho mah se Champions League aṭanga tla te nen round of 32 (playoff) an khelh a ngai dawn - pahnihna ni chunga tlang chuan, kum tharah match hautak vawi hnih khelh belh a ngai tihna a ni.

Premier League hmahruaitu hi Southampton nen an inhnehtawk zo chiah a, tunah an tlawm zui. Pathianni zan dar 7:30-ah Nottingham Forest an mikhual dawn, an hmahruaina humhim turin chak an mamawh.

Gunners manager Arteta chuan, "Kan result hi a lawmawm loh, European football a nih avangin khawi team pawh hneh an harsa tih kan hriat a ngai. Player ṭhenkhat kha an chau, ball pawh an um hleithei lo," tiin harh a ngai tih a sawi.