FIFA U-17 Women's World Cup 2022 Zaninah final khelh a ni dawn ta

India-in a thlen mek, FIFA Under-17 Women's World Cup 2022 final chu Pathianni zan dar 8:00-ah khelh a ni dawn a, Colombia leh Spain ten kum 17 hnuai lama hmeichhe football thiam ber nih an inchuh dawn.

Colombia leh Spain hi group stage-ah, group khatah an lo awm dun tawh a, point ruk ve ve hmu chungin knockout round an lut - group stage-a an inkhelah Spain an chungnung zawk a, Jone Amezaga goal khung hmangin 1-0 in an chak.

Mahse, final-ah chuan boruak a danglam tawh dawn a, Spain tan group stage-a an lo chak tawhna ringawt chu chhuan theih a ni lo ang.

Colombia tan, senior team tan pawha inlan thei Linda Caicedo bawk chu innghahna a ni leh dawn - kum 17 mi forward hian tun inelnaah goal li a khung tawh a, Japanese midfielder Momoko Tanikawa nen an goal khung zat a inang.

Spain-in tun inelnaah rin loh taka Mexico an ngam lo tih loh kha chu tlawm an la nei lo a, Colombia hian duh thlang thei ta se, final-a Spain tum hi an châk lo ang.

Spanish team-ah player langsar an awm nual - tlarhnungah Athletic Bilbao tana khel Sara Ortega, Barcelona midfielder Vicky López leh Real Madrid forward Carla Camacho te chu en bik tur an ni dawn.

FIFA U17 Women's World Cup final hi Sports18 channel-ah live-a en theih a ni dawn a, online-a en duh tan Voot leh Jio TV app-ah te a en theih dawn bawk.

Final hi DY Patil Stadium, Navi Mumbai-ah khelh tur a ni dawn a, AIFF League committee chairman Lalnghinglova Hmar chuan final hi a hmunah a chhim ang.

October 30, Pathianni Zan
Pathumna Zawnna
Nigeria 4:30 PM Germany

Final
Colombia 8:00 PM Spain