Australian Open beiseitu Djokovic

Tennis season kal lai a la zo lo a, mahse Novak Djokovic tan chuan season thara a awmdan tur ngaihtuah a hun leh der tawh. Grand Slam hmasa ber chu January thlaah khelh a ni dawn, tun aṭanga thla hnih hnu lekah Australian Open an khel leh tawh dawn tihna a ni.

Kumin January thla khan Djokovic hian Melbourne khawpui a pan hman. Mahse, Australia ram sorkar dan leh hrai a zawm lo a, hripui leng Covid-19 laka invennan vaccine a lak loh avangin tournament a khelh hmain an thawn haw.

Nomawi a kawl lai a humhim thei lo a, Australian Open bakah hian vaccine lak duh loh vang bawkin US Open pawh a khel thei lo. French Open khel mah se a champion lo a, grass court inelna lian Wimbledon title erawh a la thung.

Grand Slam vawi 21 champion tawh Djokovic chuan, "Mitin hian dikna chanvo kan nei vek a, tumah hi intih luih a ṭha ka ti lo. Tun hma lama ka lo sawi tawh angin, ka taksa chungchangah chuan doctor ka nei a, ka tana ṭha turin engkim kan ti.

"Australia leh United States ka pan theih loh avangin titi a ti tam tih chu ka hria, mahse season tharah chuan heng harsatna hi a kiang tawh turah ka ngai. Ram ṭhenkhat pawh an inhawng zau zel a, kawl a eng ngei dawn niin ka hria," tiin beisei a nei sang hle.

Djokovic hian Australian Open nomawi hi vawi kua ngawt a chawi tawh a, champion hnem ber a ni. Kum 35 mi a ni tawh a, Grand Slam champion hnem ber record a siam duh a nih chuan major tournament awm apiang hmachhawn theih a pawimawh.