Odisha-in phuba an la ta

Durand Cup quarterfinal-ah Bengaluru-in Odisha FC an hneh a, Ningani zan Indian Super League-a team pahnih an intawn hmain, Odisha midfielder Isak Vanlalruatfela'n team-in phuba lak an châk thu Vanglaini a hrilh.

Ningani zan a thleng a, Odisha-in an duh ang ngeiin phuba an la ta a, an mikhual Bengaluru chu 1-0 in an hneh - Nandhakumar Sekar chuan minute 33-naah inkhela goal awmchhun a khung a, Bangalore club-in a chhanletna tur an nei lo.

Odisha tan Jerry Mawihmingthanga'n goal khung theihna remchang vawi hnih ngawt a nei a, mahse, an match hnuhnung bera goal khungtu winger hian a khung thei tlat lo - a vanduai ṭum a tawng.

Kalinga Stadium, Bhubaneswar-a inkhelah hian Odisha tan Jerry-a chu Mizo player bul ṭan awmchhun a ni a, Isaac Vanmalsawma chu bench aṭanga luhtir a ni thung - Bengaluru-ah Mizo player an awm rih lo.

Odisha-in match li an khelh aṭangin vawi thum hnehna an chang ta a, table chung berah awmin hma an hruai mek.