Quarterfinal-ah Alcaraz a lut

Swiss Indoors khelh laiah player langsar an inlan hnem a, world number 1 Carlos Alcaraz chuan Botic van de Zandchulp 6-4, 6-2 a hnehin quarterfinal a inhlangkai.

Kum 19 Alcaraz a chak lai hian, world number 1 hlui Andy Murray erawhin Roberto Bautista Agut chu 6-3, 6-2 in a hneh lo a, quarterfinal thleng zo loin last 16-ah a zinkawng a tawp thung.

Spanish tlangval Alcaraz-a'n a ball vuak nat a chhawr ṭangkai lehpek hle, vawi 20 ngawt winners a vaw chhuak a, unforced errors vawi kua chauh a nei, duhthusam vek ni lo mah se a khel ṭha hle.

Quartefinal-ah chuan seeded pangna Pablo Carreno Busta a hmachhawn leh ang, a awlsam dawn lo, fimkhur leh mahni inveng thiam tak chunga a hmachhawn a ngai dawn a ni.

Inkhel dangah Felix Auger-Aliassime pawh a chak, seeded pathumna hian 6-7 (3), 6-4, 6-4 in wildcard hmanga inlan Marc-Andrea Huesler chu a hneh.

Seeded player zingah, number 7 Alex de Minaur erawh rawlthar Holger Rune lakah 6-2, 7-5 in a chak lo. Inelna neih hnuhnung ber kha chuan De Minaur hian final a khel phak.

Swiss Indoors an khelh hnuhnung ber chu 2019 daih tawh kha a ni a, hripui leng vangin a hnu lamah an chawl, champion lai chu Roger Federer a ni a, tunah chuan inkhelh a chawlhsan tawh, kuminah champion thar kan hmu dawn.