Kan hloh hlepah kan chhiar tur a ni - Allegri

Chak ngei ngei a ngaih tawhna inkhelah pawh Juventus an tlawm a, an hlawhchhuah chu Champions League group stage paltlang zo loa tlak a ni. Old Lady manager Massimiliano Allegri chuan lungngaia indawm kun mai loin, hma lam an thlir zawk tur a ni tih a sawi.

Juve hian UCL match nga an khel a, vawi li an tlawm. Khelh hmabak pakhat la nei mah se last 16 an lut thei tawh lo, tunah chuan Serie A an ngaihpawimawh zual a ngai dawn, hei pawh hi a awlsam dawn lo.

Allegri chuan, "Harsatna te hi midang min siamsak a ni lo, keimahni siam chawp vek a ni. Tun hnai kan inkhel ho thlirkir ila, harsa vak loa chak theihna tur awm angah pawh kan chesual leh tlat zel.

"UCL aṭanga kan tla kha a ni, mahse heng kan lungngaihnate hi min tichak tuah kan hmang tur a ni. Kan insiamṭha nghal tur a ni a, a bul ṭan nan Lecce kan hmang nghal tur a ni ang," tiin a sawi.

Juventus hi Serie A table-ah pawh pariatna daih an ni, match 11 aṭangin point 19 an hmu; hmahruaitu Napoli chuan khelh zat inangah point 29 an nei tawh thung a, league nomawi chawi a harsa tawh dawn.

Season hmasa pawh khan Allegri naute hi an che ṭha tawk lo, a tawpah palina an ni phak hram a nih kha. Kuminah pawh dinhmun ṭha lo takah an ding leh mek, an insiamṭha rang a nih loh chuan season thara Champions League khelh phak pawh a harsa ang.

Juventus hian zanin dar 9:30-ah league match khel turin Lecce chu khualmualah an lenchilh dawn a, match 11 khelh tawha tlawm la nei lo Napoli-in Sassuolo an mikhual ang a, Inter Milan chuan zanin dar 12:15-ah Sampdoria an mikhual dawn bawk.

Champion lai AC Milan chu Pathianni zan dar 1:15-ah an inlan dawn chauh a, khualmualah Torino an lenchilh ang.