Guardiola hmachhawn tur Sanchez

Hneh loh nei loa Arsenal-in Premier League nomawi an chawi aṭangin ṭhangkat lian zet a ni tawh a, Arsene Wenger-a record thai bo thei tura hma la mektu chu Manchester City manager Pep Guardiola a ni. Pathianni zan dar 7:45-ah club pahnihte hi Etihad Stadium-ah an intawng ang.

Manchester City hi match 10 chhung hneh loh nei loin an kaltluang mek a, league hmahruaitu an nih bakah goal khung hnem ber (35 goals) an nih avangin team hlauhawm leh hmuhnawm an ni; an khingpui tur Arsenal hi Guardiola-a'n a team tana khel tura a duh em em Alexis Sanchez khelhna a ni thung - attacking game hmuhnawm kan hmuh ngei a rinawm hle.

Hello Sanchez
Barcelona forward hlui San­chez-a'n season hmasa khan Arsenal tan inelna hrang hrangah goal 30 khungin Premier League hmatawng hriam berte zinga mi a ni a, champion tum Pep Guardiola chuan Catalan club tana khel tawh Sanchez hi a duh anga a khelhtir theih tur a ni tih a hriat avangin a hmutai hle.

Chile international Sanchez hian Emirates Stadium-ah tun season daih bak contract a nei tawh lo. Nipui bazar lai khan City hian Sanchez hi an lei teuh hle, Arsenal hian an forward hi hralh an phal hman. Mahse, Wenger-a'n AS Monaco aṭanga Thomas Lemar a lakluh theih tak si loh avangin hun tepter tawh takah City nena an indawrna hi a titawp.

Kum 28 mi Sanchez hian Arsenal chhuahsana City pan a hreh lo tih a chiang tawh a, City lam hian January thlaah lakluh tumin an dawr leh dawn nia sawi a awm bawk. Gunners manager Wenger chuan, "Alexis hi player puitling tak a ni a, City lakah pawh buaina nei loin ṭha takin a khel thei ang," tiin a sawi lawk tawh, player huaisen Sanchez hi khelmual chhunga player 22 zinga enbik hlawh tur a ni.

Zin leh zin lo
Manchester City hian Cham­pions League last 16 inhlangkai turin Serie A hmahruaitu Napoli chu 4-2 in an va luhchhuah a, Italy-a an inkhelh ṭum hian Sergio Aguero chuan club tana a goal 178-na khungin City tana goal khung hnem ber a ni.

Pep-a'n Napoli lakah player ṭha hahchawlhtir ngawt a fuh loh zia hriain a neih ṭhat a hmang. Chutihrualin striker Gabriel Jesus erawh bench lamah dah a ni a, hun tawp dawnah dah luh chauh a ni. Brazil international striker Jesus hi a thiam loh vanga awltir a ni lo a, league lamah chuan bul a ṭan ngei leh tura ngaih a ni thung.

Premier League kan ngai­pawimawh ber titu Arsene Wenger-a'n Europa League lam­ah a neih ṭhat a dahṭha vek, City hmachhawn tur hian Emirates Stadium-a Serbian club Red Star Belgrade laka inlan player an inlan nawnin a rinawm loh. Player manto ber Alexandre Lacazette tlawp turin Sanchez leh Mesut Ozil te an awm leh thei dawn - City tlarhnung tan ven uluk a fin thlak ang.

Club pahnihin an neih ṭhat ber an thawhchhuah pui dawn a, City player tam zawk hi Italy-a zin chau an nih laiin Arsenal player erawh league match khel tura hahdamtir an ni thung. Minute 90 inkhel tur an ni a, khawveal huap pawha player langsar ni phak awmkhawm hi vawi khat zin vanga danglam vek tur erawh an ni ngawt bik lo.

A theih loh?
Spanish manger Guardiola-a'n a duh ang player a la khawm tawh a, attacking game mawi hmangin an khingpui apiang an sawisa chho mek. League hmahruaitu an nih theihna kalkawngah hian Liverpool leh Chelsea te pawh an hneh tawh. Mahse, City midfielder Kevin De Bruyne chuan hneh loh nei loa nomawi chawi chu a harsat a rin thu a sawi.

City player pawimawh De Bruyne chuan, "Hneh loh nei loa season hman tluan chu a harsa ngawt ang, a theih ka ring lo hial zawk. Team tin mai hi an ṭha em em vek a, tun hma ai chuan inelna a sang tawhin club-te kan inel nasa tawh zawk," tiin a sawi. Kum 2010-11 season khan Manchester United chuan an league match hmasa 17-ah hneh loh an nei lo a, United bak hi chu Arsenal record hnaih thei deuh an la awm lo.

Pep-a'n Reds a hneh ṭum hian Sadio Mane chu hnawh­chhuah a ni a, Blues laka hnehna an chan ṭum pawhin hliam vangin Alvaro Morata thlak a ngai bawk - club lian pahnih hi an ṭhat dan berin an hneh lo. Tun kartawp hian City-in player hrem leh hliam langsar nei loin Gunners an mikhual thei dawn.

City mikhual tur Arsenal hian tun season chhungin khelmualah result ṭha an nei hleithei lo, match nga an khelhah vawi khat chiah hnehna an chang. Eithad Stadium-a inkhel tur an nih avangin Guardiola naute hi chak tura rinkai zawk an ni a, chutihrualin Gunners hian City laka an record ṭha tak chu an thlanmuanpui ve thung ang.

Team pahnih te hi tun hnai season thum chhungin inelna hrang hrangah vawi riat an inhmachhawn a, Gunners hian vawi li hnehna changin ṭum thum chu an inhnehtawk thung - vawi khat chiah chak loh an nei, season liam ta pathum chhung bikah chuan North London club an chungnung hle.

Arsenal an tlang
Arsene Wenger-a'n Premier League lama a chhawr ṭhin player tel miah loin Red Star Belgrade chu goal awm loin a inhnehtawkpui a, Arsenal hian match li an khelh aṭanga point 10 hmuin Europa League group stage an paltlang - group hnmahruaitu erawh an la ni chiang bik lo thung; khelh hmabak match hnih an la nei. Striker Olivier Giroud bakah Jack Wilshere leh Theo Walcott ten Arsenal tlarhma an luahlum a, Emirates Stadium-ah inkhel thunun viau mah se goal erawh an pai lo. Gunnres hian an khelmualah a zawnin inelna hrang hrangah match 16 chhung hneh loh an tawng tawh lo - an record ṭha ber a ni.