Nadal-a'n quarterfinal lut

Rafael Nadal chuan world number 36 Pablo Cuevas hnehin Paris Mas­ters quarterfinal a lut. David Goffin pawhin last 16 paltlangin season tawpa khelh tur ATP Finals atan hmun a chang chiah bawk.

Ningani zan inkhelah Nadal hian 6-3, 6-7 (5-7), 6-3 in hnehna a chang. Nadal hian a match hmasa zawkah Hyeon Chung hnehin world number 1 ni chunga season khar thei turin a dinhmun a sawh­nghet tawh bawk a ni.

Inkhel dangah David Goffin chuan Julien Benneteau lakah 6-3, 6-3 a hnehna changin quarterfinal a lut ve a, kum 26 mi Goffin hi Belgian tennis player zinga ATP Finals khel tura in vaw tling thei hmasa ber a ni.

ATP Finals hi Novem­ber 12-19 chhungin Lon­don-ah khelh a ni dawn a, Goffin hma hian Nadal, Roger Federer, Alexander Zverev, Grigor Dimitrov, Dominic Thiem leh Marin Cilic te an tling tawh - hmun­­ruak pakhat chiah hnawh khah tur a awm tawh.

Grand Slam vawi khat champion tawh Juan Martin del Potro chuan London-a inlan a beiseina a la chhi nung ve zel. Argentine star hian inkhel inhnehtawk takah Grigor Dimitrov chu 7-6 (12/10), 5-7, 7-6 (7/3) in a hneh. Del Potro leh Pablo Carreno Busta ten ATP Finals khel tura hmunruak pakhat la awm chan tumin an inel mek a ni.

Kum 2013 hnua ATP Finals khelh beiseitu Del Potro chuan, "London-a inlan tuma kan inelna hi a nuamin a hautak chho dawn hle. A thiam pariat zinga inlan hi ka tum ber pakhat a ni a, tlin ngei pawh ka tum. Chutihrualin hun rei tak chhung ṭha taka khelh chhunzawm theih hi ka tum pakhat chu a ni," tiin a sawi.