Vawiin 4:00 pm-ah Chhinga Veng vs AR

Assam Rifles football team, Shillong-te chuan vawiin tlai dar 4:00 hian Lammualah Mizoram Premier League hmahruaitu Chhinga Veng FC nen friendly match an khel dawn.

Inkhel en man a awm dawn lo a, inkhel hmuhnawm tak erawh en tur a awm thung ang.

Nikum October thla khan MPL5 hmahruai mektu Bethlehem Vengthlang FC chu Assam Rifles lakah hian 2-3 in an chak lo. Hei vang hian Assam Rifles hi dah­hniam theih an ni lo a, Chhinga Veng tan fiahna ṭha tak a ni thei ang.

MPL lam

Chhingcows hian MFA Super Cup leh I Day Football no­mawi chawi turin match 12 chung an chak zawn a, Mizoram Premier League-ah pawh Aizawl FC chauh hneh loin league hmahruaitu an ni.

Chhinga Veng coach Lalsang­zuala Hmar chuan, "Nikumah Bethlehem Vengthlangin an hneh tawh lo a, kei ni tan chak loh nawn hi a mawi lo. Chak tumin kan khel dawn a, awmze neiin player pawh kan luhtir ang," tiin Vanglaini a hrilh.

Sanga hote hian MPL match 12 an khelh tawh aṭangin point 27 an hmu a, goal 26 khungin goal 14 an chhuah. MPL6-ah Chhinga Veng hi team ṭha ber an ni a, Mizo player ṭha rual leh foreigner pahnih awmna team hian Assam Rifles hneh ngei an tum ang.

Assam Rifles lam

Nikuma Assam Rifles-in Bethlehem Vengthlang an hneh ṭum khan Bulu Jindung chuan goal hnih khungin Akum Ao-a'n goal khat a khung. BVT tana goal hnih khungtu substitute Lalrammuanpuia (Apuia) chu tun season-ah Chhinga Veng tan a khel a, match hnuhnung bera Ramhlun North nen an inhnehtawk ṭumin Armed Veng South tlangval hian a pet goal.

Assam Rifles-ah hian footbal­ler tawnhriat nei ṭha tak tak an awm ṭeuh a, chung zinga langsar chu Akum Aoa a ni. 2010 Santosh Trophy-ah khan Assam striker Akum Ao hian goal kua khungin top scorer a ni a, tuna Assam Rifles player pawimawh ni zui ta hnaih bertu chu Punjab striker Balwant Singh-a'n (Mumbai City) goal riat a khung.

Akum Ao bakah hian player ṭha dang Thang Kuki leh M Chhetri te an awm a, Chhinga Veng tlarhnung tana hnawksak pha tur an ni.