Evra-a'n a kungfu thiam a 'show'

Marseille defender Pa­trice Evra chuan an fans zinga pakhat a 'kick' avang­in inkhelh ṭan hmain hnawh­chhuah a ni. French club Marseille hian Ningani zan khan Vitoria Guimaraes an lenchilh a, 1-0 in an tlawm. Inkhelh ṭan hmain Marseille fan-te chuan warm up nei lai Evra hi an au el a, an fan-ten an au el hi hrethiam loin an zinga pakhat chu a kick ta a ni.

French chanchinbu lar L'Equipe-in a tarlan dan chuan Marseille fan-te hian inkhelh ṭan hma darkar chanve vel zet chhung chu Evra hi an au el a, Manchester United defender hlui hi fans zingah pheiin boruak tih daih aiin heti zawng hian a che ta zawk.

Marseille coach Rudi Garcia chuan, "Evra hi player tawnhriat ngah tak a ni a, khatianga che tur kha a ni lo. Fan-te min auh elna hi kan chhang tur a ni lo a, hetiang hunah hian insum a pawimawh em em a ni," tiin a player-in fan-te auh elna a chhanglet chu ṭha lo a tih thu a sawi.

Buaina thlen dan

Substitute-ah Evra a awm a, a ṭhiante nen khelmualah warm up an nei.

Fan-ten minute 30 chhung zet United defender hlui hi an au el

Fans lam panin Evra a phei a, an lam hawia ball a pet hnuah a ṭhiante rawn kalin an beng dai

Evra-a'n khelmual hungna zuan kanin fans lam a pan a, mahse khelmual lamah a kir leh

Fans ṭhenkhatin Evra an rawn pan hnai a, United left back hlui hian an zinga pakhat chu a lo 'kick'

Substitute bench lamah Evra hruai phei a ni a, mahse referee-in a hnawt chhuak.