Srikanth-a'n a tawng sang ber

Badminton World Federation (BWF) chuan Ningani khan ranking thar a ti chhuak a, mipa singles-ah Kidambi Srikanth chuan point 73,403 hmuin pahnihna a ni a, Indian mipa shuttler zingah world ranking-a tawng sang ber a ni.

Kum 24 mi Srikanth hian kuminah Super Series title pali a la thei a, ranking lama a tluk loh awmchhun chu Denmark tlangval Viktor Axelsen chiah a ni. Chinese legend Lin Dan leh Lee Chong Wei te chungah Srikanth hi a awm.

Indian mipa shuttler dang HS Prannoy chuan hmasawn hretin 12 aṭangin 11-naah a kai chho a, hmeichhe singles star PV Sindhu chu pahnihnaah la awm zawmin world number 1 hlui Saina Nehwal erawh tun hnaiah result a neih ṭhat tawk loh avangin 11-naah a awm thung.