Pathianni zanah Stamford Bridge-ah Manchester United an lêng dawn

Premier League champion lai Chelsea chuan Pathianni zan dar 10:00 hian anmahni ang bawka champion tura rinkai Manchester United an mikhual dawn a, football ngainaituten Stamford Bridge lam an hawi ang.

Blues hian match 10 khelh tawh aṭangin point 19 an hmu a, palinaah awmin hmahruaitu Manchester City point kuain an pha lo. United hian point 23 an hmu tawh thung a, Antonio Conte hote tan an inkar tih zimna hun ṭha tak a ni thei ang.

Mualpho hlim

Italy-ah Chelsea-in Roma an tlawh a, goal thum chhuahin goal an khung lo. Champions League-a an result avang hian Italian manager Antonio Conte a thinur takzet a, player enkawl danah dan thar a duang nghal niin khawtlang media te chuan an tarlang.

Blues boss Conte hian a dan zawm lo chu senior player pawh ni se thlauh thlak pawi a ti lo a, season liam taa club top scorer Diego Costa paihtu a nih avangin a thusawiah a ding tlang a rinawm. Italian manager thutluknaah hi ro rum mah se a vanneihna chu Jose Mourinho hun laia anga player lungawi lo an awm lo nia sawi a ni. Amaherawhchu, Chelsea hian an muala United an hneh lo a nih chuan boruak ṭha lo awm thei reng tawha ngaih a ni thung.

Tun dinhmunah chuan Conte hnungah club thuneitute an la ding a, an club leh buaina an sawi zawm reng lohna atana damdawi ṭha ber chu 'chak' a ni ang.

United ve thung

Manchester United erawh Champions League match li an khelh aṭanga hnehna an chan vek avangin knockout stage an lut tawh a, league-a an match hnuhnung berah Antonio Martial goal hmangin Tottenham Hotspur an hneh bawk.

Jose Mourinho chuan, "Inkhel thlir dan hi chi hrang hrang a awm thei a, ka player-te hian tun aia nasa a fak hi an phu a ni. Entirna ṭha tak chu Tottenham-in Liverpool 4-1 in an hneh a, Real Madrid 3-1 in an hneh a, kan lamah erawh goal an khung lo," tiin attacking football an khel tawk lo tiha sawi tawk awm mah se an khelh dan chuan fak a phu thu a sawi.

Chelsea manager hlui Mourinho chuan sawi chhunzawmin, "Ka club hlui ka hmachhawn tur hi ka tan chuan a lian hran lo, football-in a ken tel a ni a, professional takin kan hmachhawn mai tur a ni. Tuna thil lian tak erawh club lian pahnih kan inkhel dawn a, chuvangin inkhel pawimawh a ni. Stamford Bridge hi Inter Milan ka enkawl laiin vawi khat ka tlawh tawh a, Manchester United ka enkawl hnuah vawi hnih tlawh leh tawh a, tlemin a danglam tih chu ka zep lo. Amaherawhchu kum li nga ral hnuah erawh Chelsea manager ka ni ṭhin tih pawh an hre tawh kher lo ang," tiin thil hlui tawh theihnghilh a chak a pawimawh thu a sawi.

Inkhel tur chu

Chelsea-in midfielder ṭangkai N'Golo Kante an chhawr theih tawh a rinawm a, French midfielder goal khung khat tak hian league leh FA Cup-ah United lamah goal a khung tawh. Hetihlai hian Victor Moses erawh hliam vangin chhawr theih tur zingah a la awm lo.

United lamin inhliam an nghah a; Michael Carrick, Marouane Fellaini, Zlatan Ibrahimovic, Paul Pogba leh Marcos Rojo te awm loh an tuar tih phat rual a ni lo a, Champions League-a Benfica an hneh ṭumin Jesse Lingard chu hnung na vangin a la chhuak bawk. Portuguese manager chuan he thuziah lai hian a player inhliam dinhmun a la tichiang duh lo.

Season ṭan hmain Chelsea leh United-in Romelu Lukaku an inchuh a, Jose Mourinho hoten hnehna changin London club-in Red Devils lak tak loh Alvaro Morata an la thung. Belgian striker Lukaku hian goal sarih a khung tawh a, Spanish forward Morata hian goal sarih a khung tawh a, tun hnaiah erawh player pahnih hi an tlahniam. Zanin hian Stamford Bridge-ah forward pahnih khaikhinin an awm dawn a, ṭhenkhat tan chuan inkhel en phahna chhan tur a ni.

A behbawm

Manchester United-in season ṭan hma khan Chelsea champion-na kawnga player pawimawh Nemanja Matic chu pound maktaduai 40-in an lalut a, Portuguese manager Mourinho pawhin mak a tih thu a zep lo.

Mourinho chuan, "Matic-a agent-in min rawn biak khan mak ti a, a chhan chu amah kha ka hriat chian a ni a, player tih itawm nana mi dawr kual chi a ni lo tih ka hriat vang a ni. Kei chuan ka duh thu ka hrilh nghal a ni," tiin Chelsea player an lakchhuah dan a sawi.

Matic-a'n United-ah hmun pawimawh chang nghalin league match zawng zawngah a la inlan kim vek a, Chelsea duh loh hi United tan hlawkna a ni tih zep rual a ni lo. Serbian midfielder Matic hian London club a chhuahsan hnua a vawi khat nan Stamford Bridge a tlawh dawn a, Mourinho leh Juan Mata te nen an club hlui an hmachhawn ang.

Fixtures
Zanin Inkhel Tur
Stoke City 6:00 PM Leicester City
Huddersfield Town 8:30 PM West Brom
Newcastle United 8:30 PM AFC Bournemouth
Southampton 8:30 PM Burnley
Swansea City 8:30 PM Brighton & Hove
West Ham United 11:00 PM Liverpool
November 5, Pathianni
Tottenham Hotspur 5:30 PM Crystal Palace
Manchester City 7:45 PM Arsenal
Chelsea 10:00 PM Manchester United
Everton 10:00 PM Watford