Brewster tan nghah peih a ngai - Gerrard

Liverpool legend Steven Gerrard chuan FIFA World Cup Under 17 khelh zawh taka top scorer Rhian Brewster chuan Liverpool first team tana khel phak thuai tur chuan a nghah peih a ngaih tur thu a sawi.

Chelsea academy aṭanga Liverpool zawmtu striker Brewster hian India-a khelh zawh tak inelnaah khan goal riat a khung a, quarterfinal leh semifinal-ah a zawnin hattrick a siam. World Cup-a a chet ṭhat avangin Brewster-a chungah beiseina a sang a, mahse Gerrard-a'n hmanhmawh lo turin a duh.

Liverpool U18 boss Gerrard chuan, "First team-ah player ṭha tak tak kan kawl a, a bik takin tlarhmaa kan player neihte hi an ṭha hle. Hei vang hian senior team tana inlan chu a harsa rih hle. Tun hma zawng ai khan senior team-a inlan hi a harsa lehzual a, kan naute pawh world class ni tura an ṭan a ngai a ni," tiin a sawi.

Reds captain hlui Gerrard chuan sawi chhun­zawmin, "Rhian Brewster hi Liverpool senior team tana khel turin kan duh. Mahse, tunah chuan a hna hmasa chu Under 23 tana goal tam tak khung a ni. Tum sang tak a nei a nih chuan a khelh ṭhat reng a ngai a, goal khung a chhunzawm reng a ngai. Chu chu senior team manager hmin theih dan ṭha ber a ni," a ti.

Liverpool hian zanin dar 11:00-ah Premier Lea­gue match khel turin West Ham an lenchilh ang.