A tawp khar dan a pawimawh - Ronaldo

Real Madrid forward Cristiano Ronaldo chuan tun hnaiah che chhe viau mah se an bul ṭan dan ai chuan a tawp an khar dan chu a pawimawh ber a nih tur thu a sawi. Real hian kar hmasa league match-ah Girona chu 2-1 in an ngam lo a, hmahruaitu Barcelona chu point riatin an thlau tawh.

Champions League lamah pawh Real-in beisei an phak chuang lo a, Nilaini zan khan Tottenham Hotspur chuan Wembley-ah 3-1 in an lo sawp. Mahse, Ronaldo chuan chet chhiat avanga chi aina hun la ni loa a hriat thu a sawi.

Portuguese forward chuan, "Kan talbuai mek tihah phat tur a awm lo a, hmasawn kan ngai. Chu chu kan ti ngei bawk ang. Tunah chuan season bul kan la ṭan chauh a ni a, a pawimawh ber chu a tawp khar dan hi a ni. Hmasawn turin hun tam tak kan la nei a, kan hun neih hi kan chhawr ngei ang tih ka chiang bawk," a ti.

Ronaldo chuan an inrintawkna an hla hloh loh thu sawi nghalin, "Hnehna kan chan loh chuan mipui hian a chhan an lo zawng ve vat ṭhin. Mahse, ka hmuhdan chuan he team hian kan inrintawkna kha kan la nei reng a, kan dinhmun ṭha lo mah se kan insiam-ṭha leh thei ang," tiin a team a ringtawk hle.

Real Madrid hian Pathianni zan dar 1:15-ah league match an khel dawn a, Santiago Bernabeu-ah Las Palmas an mikhual ang.