Kane-a'n Alli thu ṭha a hrilh

Tottenham hmatawng Harry Kane chuan no­mawi an chawi theih nan midfielder Dele Alli chuan khelmual chhung­ah nungchang ṭha a neih a pawimawh thu a sawi.

England international Alli hi World Cup qua­lifier lama Slovakia nena an inkhelh ṭuma a chet mawi loh vangin Champions League match hmasa pathum khel thei loa hrem a ni. Premier League-a Manchester United nen an inkhelh

ṭum pawhin Alli hi United winger Ashley Young nen an inkhak buai leh bawk.

Hliam dam hlim Kane chuan, "Khelmual chhungah a inthunun theih ka duh a, season tluan hian hrem tawk loa a awm tluan theih ka beisei. Player ṭha tak a ni a, a bik takin match lian kan khelh ṭuma a awm loh hian a pawi ṭhin a ni," tiin hliam vang ni loa hrem vanga inkhelh theih loh chu pawi a tih thu a sawi.

Kum 21 mi Alli hi khaw­vel midfielder hmuh­nawm berte zinga mi a ni chho mek a, Thawhlehni zana Champions League nomawi kawltu Real Madrid an hneh ṭum pawh khan goal hnih a khung a ni - Spurs hian last 16 an inhlangkai tawh.

Premier League lamah Tottenham hi pathumna an ni mek a, hmahruaitu Manchester City nen an inkarah point riat a awm mek. Pathianni tlai dar 5:00-ah table mawngphah a awm Crystal Palace an mikhual ang.