Europa League aṭangin Everton an tla
Premier League club zinga sum hmang hnem pawl ni phak Everton chu Europa League group stage paltlang zo loin an tla. Everton hian match li an khelhah point khat bak an hmu lo a, match hnuhnung pahnihah hnehna chang pawh ni se an tlang thei tawh lo.
Group E aṭangin Ligue 1 club Lyon leh Serie A club Atalanta ten point riat ve ve hmuin knock out round an lut a, group hmahruaitu tur zawk erawh a la chiang lo. Everton leh Cyprus club Apollon Limassol tan erawh round sang zawk luh theihna kawng a inhawng ve tawh lo a ni.
Everton an tla
Ningani zan inkhelah Everton hi Lyon khelmualah 3-0 in an tlawm, French Ligue 1 club tan hian Chelsea player hlui Bertrand Traore, Houssem Aouar leh Manchester United midfielder Memphis Depay ten goal khat ṭheuh an khung a, hun tawp hma minute 10 chauh a awm tawh tihah Toffees midfielder Morgan Schneiderlin chu yellow card vawi hnihna hmuh vangin hnawhchhuah a ni.
Everton hian Ronald Koeman an ban hnuah manager nghet an la nei lo a, manager lailawk David Unsworth-a'n a duh anga a nau ten an khelh theih nan training-na hun an mamawh thu a sawi tawh, match hnih a kaihhruai hnuah pawh hmasawnna hmuh tur a awm chuang lem lo.
English club zingah Toffees hi Europa League match hmasa palia hnehna chang miah lo hmasa ber an ni a, kum 1997 hnuah French team laka English club chak lo chiang ber an ni bawk. Merseyside club hian inelna hrang hranga an match hnuhnung 16-ah goal 15 zet chhuahin an che chhe takzet. A zawnin match nga chhung an tlawm tawh a, an club record chhe ber an siam mek.
Everton manager lailawk David Unsworth chuan, "Kan result avang hian ka lawm lo takzet. Minute 70-na thleng kha chuan kan ruahman angin kan khel thei fu a, hun ṭha kan insiamsak bakah kan tlarhnung pawh an khawng ṭha hle. Mahse, hun tawp hmain rilru dang kan put avangin a tawpah kan mualpho a ni," tiin a sawi.
Player thar lakluh nana pound maktaduai 150 vel zet hmangtu Everton hi Premier League table-ah pawh a hniam ber pathumnaah an awm mek a, Pathianni zan dar 10:00-ah Watford an mikhual ang.
Milan an chelh
AC Milan manager Vincenzo Montella chuan a dinhmun derthawn tawh zia a hrechiang, Ningani zana AEK Athens nen goal awm loa an inhnehtawk hnuah Italian manager hian, "Min vuina tur hun chu ka nghak mek a ni," tiin a sawi.
Chinese sumdawng hausakna zarzotu Milan hian nipui lai khan player 10 chuang an lalut a, club neitute duh leh beisei ang result erawh an nei hlei thei lo. Serie A lamah champion tura rinkai an ni phak tawh loh a, Europa League lamah Milan hian point riat hmuin group hmahruaitu ni mah se team nem zawk nia ngaih lakah beisei angin an chhe chhuak thei lo a ni.
Milan captain Leonardo Bonucci chuan, "Khelmual chhungah chuan manager aiin player mawhphurhna a sang zawk, Montella duhdan leh ruahmanna ang kan thlenpui thei lo hi pawi ka ti a, kan result-ah hian manager aiin player te hi dem tur zawk chu kan ni," tiin a sawi.
Inkhel dang
Serie A club ṭha Lazio chuan Group K lama an elpui ber Ligue 1 club Nice lakah 1-0 a hnehna changin group stage an paltlang a; Russian club Zenit chuan Group L aṭanga last 32 lutchiang turin Rosenborg chu 1-1 in an inhnehtawkpui ve bawk.
Europe club-te inelna sang ber dawttuah hian Arsenal, Lazio leh Zenit ten knock out round an lut chiang tawh a, Everton bakah Vardar leh Maccabi Tel Aviv te tan erawh an match hmabak pahnih chu inkhel awmze nei tawh lo mai a ni thung.