Ferrari hma hun a chiang lo?

Formula 1 team hlun ber Ferrari chairman Sergio Marchionne chuan kum 2020 hnulamah car intlansiakna sang berah hian an tel chhunzawm zel ang em tih chu a chian tawh loh thu a sawi, an hma hun a chian loh chhan hi Formula 1 neitu thar Liberty Media lamin kalphung tih danglam an tum vang nia sawi a ni.

Italian sportscar siamtu Ferrari hian kum 1950-a Formula 1 tlan ṭan a nih aṭang khan khaihlak nei loin an la inlan chhunzawm char char a, anni chiah hi la inlan vek thei awmchhun an ni.

Ferrari chairman Sergio Marchionne chuan, "Formula 1 hi kan thisenin a ṭhanhnan tawh a, chutih rualin hmasawn zawnga a kal zel lo emaw, kan duh leh beisei anga thil a inthlak danglam lo a nih chuan kum 2020 hnu lamah kan inlan chhunzawm zel ang tih ka sawi chiang thei lo," tiin a sawi.

Ferrari hian Formula 1 inelnaah hian vawi 228 hnehna an chang tawh a, constructors' championship-ah vawi 16 chu a sang ber an ni tawh bawk. Mahse, kum 2008 hnulamah an la hlawhtling leh lo a, kuminah pawh Mercedes an tluk lo a ni.