Zaninah AFC U19 khel dawn

India chuan zanin dar 12:30 hian AFC U-19 Championship qualifier 2018-a an match hmasa ber an khel dawn a, a thlengtu Saudi Arabia an hmachhawn nghal dawn avangin match a hautak dawn - India U19 hian November 2 khan inelna neihna hmun tur hi an thleng tawh a, squad-ah hian Mizo rawlthar Edmund Lalrindika leh Lalawmpuia te an tel.

FIFA U17 World Cup leh Bhutan-a SAFF U19 Championship khelh zawh tak aṭanga squad inremkhawm India hian inelna hmachhawn hma hian Qatar-ah friendly match vawi hnih an khel a, Qatar U19 lakah 1-0 a tlawmin Qatar Stars League club Al-Gharafa SC U19 chu 3-1 in an hneh thung.

AFC U19 Qualifier-ah hian Group A - J ah ṭhen hran niin Group A leh B-ah team panga an awm a, group dang zawngah team pali an awm thung. Group tina hmahruaitu hi nakkuma AFC U19 Indonesia-a khelh turah an tling chiang ang a, pahnihna zinga a ti ṭha panga an tling bawk ang.

Inelna thlengtu an nih avanga tling chiang tawh sa Indonesia chu an group-a pakhatna an ni emaw, pahnihna ti ṭha panga zingah an tel a nih chuan pahnihna ti ṭha paruk zinga tel phak chu AFC U19 khel tur hian an tling ve dawn bawk a ni.

FIFA U17 World Cup khelh zawh taka India coach Luis Norton de Matos chuan, "Kan match zawng zawngah theihtawp chhuahin kan khel ang a, result

ṭha tak hlawhchhuah kan tum ang. Chutihrualin kan khingpui turte hi kan hria a, tum hautak em em an ni vek dawn," tiin an hmabak a ko thu a sawi.

India khelh dan tur - Group D

November 4: India vs Saudi Arabia

November 6: India vs Yemen

November 8: India vs Turkmenistan

India squad

GOALKEEPERS: Dheeraj Singh, Mohammad Nawaz, Prabhsukhan Singh Gill.

DEFENDERS: Namgyal Bhutia, Sahil Panwar, Deepak Tangri, Ashish Rai, Boris Singh, Sanjeev Stalin, Anwar Ali, Jitendra Singh.

MIDFIELDERS: Abhishek Halder, Princeton Rebello, Suresh Singh, Amarjit Singh, Rahul KP, Ninthoinganba Meetei, Nongdamba Naorem, Jeakson Singh.

FORWARDS: Edmund Lalrindika, Roshan Singh, Lalawmpuia, Rahim Ali.