ISL match hmasa ber Kochi-ah

Indian Super League enkawltu Football Sports Development Limited (FSDL) chuan tun season ISL match hmasa ber chu Kolkata khawpuiah khelh turin ruahmanna siam tawh mah se an ruahmanna hmasa hi an thlak a, match hmasa ber hi Kochi khawpuia khelh tura sawnin final chu Kolkata-ah khelh a ni thung ang.

Indian football-a league ngaihven hlawh ber ISL hi November 17 aṭangin khelh ṭan a ni dawn a, match hmasa berah hian Atletico de Kolkata leh Kerala Blasters an inhmachhawn ang. FSDL chuan, "ISL final chu Kolkata khawpuiah khelh tura ruahmanna siam a ni a, hetiang a nih tak avang hian match hmasa ber tur chu Kochi lama khelh turin sawn a ni ta a ni," an ti.

FIFA Under-17 World Cup khelh zawh takah khan Kolkata khawpui chuan hlawhtling takin final a thleng a, FSDL chuan he hlawhtlinna hi hriain ISL final pawh Kolkata khawpuia nghah ve turin thutlukna a siam ta a ni.