Amex Stadium-ah Potter-a 'Chelsea' an mualpho

31st October, 2022

Graham Potter-a'n a club hlui Brighton & Hove Albion a hmachhawn a, Amex Stadium-ah Chelsea 4-1 in an tlawm. Goal lut zat leh inkhelh dan thlirin tun season-ah Chelsea tan Premier League nomawi chu vana rah ang a ni dawn a, Champions League khelh phak pawh a harsa ang.

Seagulls-in minute ngana lekah Leandro Trossard hmangin an khung a, Ruben Loftus-Cheek (14') leh Trevoh Chalobah (42') ten an lamah an tihluh belh. Second half minute 48-naah Kai Havertz hmangin Blues-in siphurh sut ṭhen mah se injury time-ah Pascal Gross-a'n Brigton tan a khung belh.

Champion beisei ngam Chelsea tan goal li chhuah hi a zahthlak a, Brighton aia Blues thlangtu manager Potter tan a zahthlak lehzual. English manager Potter hi Brighton ṭantuten an au el nasa hle.

Potter chuan, "Ngaihdam dilna chhan tur emaw inthliam lohna chhan tur emaw ka nei lo. Dinhmun ṭha taka ka dah hnuah club ka chhuahsan a, chutihrualin mitinin ngaihdan kan nei thei thung," tiin Brighton ṭantute chungchang a sawi.

Chelsea chungchang sawi chhunzawmin Potter chuan, "Chance kan neih ang kan hmang ṭangkai lo a, anni lamin an hmang ṭangkai thung. Team indin chho mek kan ni a, kan tawrh a ngai a, hmasawnna turin hrehawm hmasak a ngai. Tumahin kan team hi kan dik thlap tawh thu an sawi lo a, kan la inzir zel a ni," a ti.

Blues hi Seagulls lakah mualpho hle mah se Potter-a hnuaia an chak lohna hmasa ber chauh a ni. Chutihrualin Thomas Tuchel hnuaia Champions League nomawi chawi thei team hi Potter-a hnuaiah an game a nung tawk loh avangin Blues ṭantute zingah German manager Tuchel chhuak pawi ti fe fe an ṭhahnem hle.

Seagulls erawh Potter thlaktu Roberto De Zerbi hnuaiah an chakna hmasa ber ni chauh mah se an khelh dan vangin an fak hle. Brighton hian Man City lakah ball chang tam zawkin Premier League champion lakah hian tlarhnungah an in pass ngam. Chelsea lakah erawh Brighton hian goal an khung hma (hei ai pawha khung hma thei an ni hial) avangin goal venhim an ngai pawimawh a, chutihrualin an attack erawh a hlauhawm reng thung, chak an phu hle.