Muaythai inelna lian an zo fel

Tualchhung Muaythai inelna lian leh ngaihhlut - Mahindra Pikup 4x4 LPS Pro Muaythai 2022 chu Zirtawpni zan khan a hmawr bawk a ni a, title fight panga awmin a hmuhnawm vek.

R. Dengṭhuama Indoor Stadium, Mualpuiah hian flyweight, bantamweight, lightweight, welterweight leh super middle (open) hmanga inelna neih a ni.

Flyweight
Joseph Vanlalhruaia (Hunthar) bt Lalngaihawma (Hunthar)
Unanimous Decision (30-27, 29-28, 29-28)
Title inchuhtute hi unau an ni a, fight dang angin a boruak a sang tawk lo deuh. A upa zawk, 2019 Asian silver medal latu Joseph Vanlalhruaia'n a nau Lalngaihawma lakah title a la.

Bantamweight
Lalruatkima (Falkland) bt Ramdinthara (Pangzawl)
Unanimous Decision (29-28, 29-28, 29-28)
Lalruatkima'n muaythai thiam bik a nihna a lantir, a hnek leh nghawk a hlauhawm ṭhin hle. Ramdinthara'n ṭum danga a khelh dan a phak lo, a innghahna a kuttum hmang ṭha viau mahse chakpui nan a tawk zo lo. Ruatkima chakna hnar chu a ke a hmang thiam em em kha a ni bawk.

Lightweight
Ngursaimawia (Luangmual) bt George Lalmuanawma (Chawnpui)
Split Decision (28-27, 28-27, 26-29)
George Lalmuanawma'n nawr viau mah se Ngursaimawia a chiai duh lo. Ngura hian a ke ding lamin a khingpui bekah a petsak a, a dinhmun a siam ṭha viau. Muanawma'n nawr reng mah se awmze neiin a che hleithei lo a ni.

Welterweight
Zarmawia (Chite Veng) bt Isaac Lalchhuanmawia (Chanmari)
Split Decision (28-29, 29-28, 29-28)
Tharum ngah, chau har bawk Zarmawia'n fight inhnehtawk takah hnehna a chang. Zarmawia kutthlak hi a na a, vir chunga a khungpui a nghawk laite chuan entute thawm a ṭha thei hle, round thum chhung a hmuhnawm vek.

Super Middle (Open)
Lalṭhasanga Lelhchhun (Tanhril VT) bt David Lalremruata (Zemabawk N)
Technical Knockout (27 sec)
Lalṭhasanga Lelhchhun lakah David Lalremruata a che hman lo. Fight ṭan aṭanga second 27-na lekah world championship round of 16 lut tawh, kum 26 mi Ṭhasanga'n a ke ding lamin a bekah a pet a, Remruata tluin a inhnukdawk zui a ni.