Champions League khelh phak a harsa ang - Klopp

Season ṭantira Liverpool beisei chu Manchester City nen inel a, Premier League champion nih zui a ni - beiseina leh a tak ram erawh thil dang daih a ni a, Reds manager Jurgen Klopp chuan match 12 an khelh hnuah an tan Champions League khelh phak a harsat tur thu a sawi ta!

Inrinni zan khan Liverpool hian Leeds United an mikhual a, an hneh ngei tura ngaih team hi Anfield-ah 2-1 in an ngam lo. Leeds tan Rodrigo chuan Joe Gomez tihsual zarzoin minute lina lekah goal hmahruai a khung a, Liverpool-in Mohamed Salah hmangin an sut.

Mahse, Leeds tan Crysencio Summerville chuan minute 89-naah chakna goal a khung a, Liverpool tan chhanletna tur a awm tawh lo - Reds hian match 12-ah point 16 chauh an nei a, hmahruaitu Manchester City (13 points) an hnaihna aiin table mawngphah luahtu Nottingham Forest (7) nena an inthlauhna a tlem zawk!

Liverpool boss Jurgen Klopp chuan, "Kan tih ṭhat kan chhunzawm theih loh dan ang em ema kan khelh reng chuan Champions League kan khel thei lo ang. Chu chu kan siamṭhat a ngai a ni," a ti.

Merseyside club tan Darwin Nunez chuan chance duhawm nei mah se Leeds keeper Illan Meslier chauh a hmachhawn chungin a paltlang thei lo a, Roberto Firmino tauh goal ngei tur nia lang chu Meslier hian a dansak bawk.

Klopp chuan, "Kan tih awma mawiin kan che thei lo a, hetiang dinhmuna kan ding hi a hrehawm ka ti. Mahse, hei hi kan nihna diktak chu a ni si. Kan buaina hi engtiang taka thukin nge kan en theih dawn ka hre lo a, mahse, chinfel erawh kan tum ang - a tihdamna kan zawn a ngai.

"Zanina kan inkhel hi kan en leh phawt ang a, kan tihsualte zirchiangin, chuta ṭanga inzir chu kan tum dawn a ni," a ti a, an buaina chu chinfel thuai a ngaih thu a sawi.

Manchester City (1-0) leh West Ham (1-0) a zawna an hneh hnuin, Liverpool hian Nottingham Forest (1-0) leh Leeds United (2-1) an ngam lo leh tawh a, insiamṭhat an mamawh tih hai rual a ni lo.

Klopp-a team hian Thawhlehni zan dar 1:30-ah Champions League match khel turin Napoli an mikhual zui dawn a, last 16 lut tawh mah se hmahruaitu ni chunga knockout round luh an duh chuan si li fai talin Italian club hi an hneh a ngai ang.