Spurs-in Bournemouth an lehthal

Vitality Stadium-ah Bournemouth-in Tottenham lakah 2-0 in hma hruai mah se Spurs hian 3-2 in an lehthal a, chakna goal hi substitute Rodrigo Bentancur-a khung a ni. Antonio Conte hote hian league match hniha an chak loh zawn hnuah chak hmel an hmu a, an chak dan hian phurna nasa tak a pe bawk ang.

Inrinni zan inkhelah hian Kieffer Moore-a'n first half leh second half-ah goal khungin Bournemouth-in 2-0 in hma an hruai. Spurs chesual leh thei dinhmunah an ding a, mahse hun harsaah an huaisenna an lantir. Ryan Sessegnon leh Ben Davies te goal hmangin siphurh an sut a, injury time-ah corner aṭanga ball per changfuhtu Bentancur-a'n chakna goal a khung.

Spurs coach Antonio Conte chuan, "Ka player-te mit mengah khan chak duhna ka hmu. Hetiang inkhela point thum hlawh chhuah hi a hlu a, kan rilru put hmang kan lantir bawk. Chak loh ka duh lo a, halftime-ah pawh an zia chhuah turin leh mawhphurhna la ngam turin ka hrilh. A tawpah chuan chance kan insiam tam miau avangin chak an phu a ni," tiin a sawi.