City lawmna siamtu De Bruyne

Manchester City-in Erling Haaland chhawr thei lo mah se Kevin de Bruyne an kawl a, Inrinni zan khan Belgian midfielder freekick mawi zet hmangin Leicester City 1-0 in an hneh.

Pep Guardiola hote hian match 12 aṭangin point 29 an hmu a, league hmahruaitu ni rih mah se nizan lama Arsenal-in Nottingham Forest an hneh chuan pahnihnaah an tla leh nghal ang.

King Power Stadium-ah Brendan Rodgers-a hoten hna ṭha tak an thawk a, minute 45 chhung champion lai Man City an chelh. Second half-ah erawh world class player danglamna a lang a, player pakhat thiam bikin inkhel result a thlak thei tih fiahin a awm bawk.

Minute 49-naah De Bryune chuan yard 25 aṭangin goal kilah tak a dah a, Leicester keeper Danny Ward tan dan rual a ni lo. City hian goal khung theihna dang pawh nei tho mah se Leicester City-in siphurh sutna hun ṭha an ngah zawk.

Foxes midfielder Youri Tielemans-a'n kawh zetin crossbar a pet per a, hun tawp hma hretin John Stones-a'n Ruben Dias tauh perin an lamah a lut teuh hle.

Brendan Rodgers-a'n minute 70-na chhoah attacker pahnih Kelechi Iheanacho leh Patson Daka te luhtirin siphurh sut ngei tum mah se De Bruyne-a goal mawi thai chhe turin Foxes attack a na tawk lo. Man City-in point thum hlu bik an hlawh chhuak a, team pahnihna danglamna chu world class player 'De Bruyne' a ni.