Kolkata derby-ah Bagan an ropui zawk

Indian football ti 'hot' tu leh inkhel ngaihven hlawh ni ṭhin, Kolkata derby chu Inrinni zan khan khelh a ni a, ATK Mohun Bagan chuan team ṭha zawk an ni tih pholangin, East Bengal chu 2-0 in an hneh.

Salt Lake Stadium, Kolkata khawpuia inkhel entu mipui 62,000 chuang hmaah East Bengal-in bul an ṭan ṭha zawk a, mahse, Thongkosiem Haokip tauh goal-na remchang ṭha tak a neih chu Vishal Kaith chuan ṭha zetin a lo dansak.

East Bengal-in first half-ah an khelh ṭhat rah an seng thei lo a, second half chu Mohun Bagan ta a ni - Kolkata club tan hian Hugo Boumous chuan minute 56-naah goal hmahruai a khung a, Manvir Singh chuan minute 65-naah a belhchhah ve leh bawk.

Stephen Constantine enkawl East Bengal-in a chhanletna tur an nei lo a, khel ṭha zawk Mohun Bagan-in an phu ang ngeiin hnehna an chang - East Bengal tan hian Jerry Lalrinzuala leh Lalchungnunga te chuan minute 90 an khel tluan.

Inrinni zan ISL inkhel hmasa zawkah Hyderabad FC chuan 1-0 in FC Goa an hneh a, champion lai Hyderabad hian match li an khelh tawhah tlawm an la nei miah lo - vawi thum chakin, vawi khat draw an nei a ni.

Hyderabad tan Javier Siverio chuan inkhela goal awmchhun a khung a, Goa hian si phurh sutna remchang nei mah se, bench aṭanga luhtir Alvaro Vazquez chuan minute 83-naah uiawm takin penalty a hlah - Goa tan hian Mizoram player Ayush Chhetri chuan inkhel bul a ṭan.

Zirtawpni zan khan Mumbai City chuan khualmualah 2-0 in Kerala Blasters an hneh a, South Indian club hian an match hmasa bera hnehna an chan hnuah chak an nei leh tawh lo.

Mumbai club tan Mehtab Singh leh Jorge Diaz te chuan goal an khung a, Kerala hian chhanletna tur an nei lo - Kerala tan K. Lalṭhathanga'n inkhel bul a ṭan a, Mumbai City tan Lallianzuala Chhangte leh Lalengmawia Ralte ten bul an ṭan bawk.