Napoli mualah Maradona-a lim

Diego Maradona-a lim chu Napoli khelmualah pho chhuah a ni a, an legend lim an pho chhuah niin Naples club hian an mikhual Sassuolo chu 4-0 in an sawp - Serie A hmahruaitu an nihna an sawhnghet zel.

Inrinni zan Serie A inkhelah Napoli tan Victor Osimhen-a'n hattrick a siam, Italian football inelna sang berah match khata goal thum a khungna hmasa ber a ni a, ani bakah hian Khvicha Kvaratskhelia chuan goal khat a khung ve bawk.

Osimhen leh Kvaratskhelia te hi an inkawp rem hle, an pahniha an goal khung belhkawm chu goal 16 a ni a, assist an neih zat pawh 11 a ni tawh. Tun hnaiah a zawnin match 13 chhung tlawm nei loin an club an kaltluan pui.

Malpui hliam vangin Osimhen hi tun hnaiah thla khat chuang a chawl zawk a, a lo kir leh hnuah match li khelin goal ruk a khung leh der tawh. Maradona hunlai hnua a vawi khat nan nomawi an beisei leh mek.

Argentina legend Maradona khan 1986 khan Napoli hi zawnin match 11 chhung a lo chak pui tawh, an record duhawm hi tunah an khum mek, match 13 an chak zawn tawh a ni.

Maradona-a captain armband hrenna hnuaiah Napoli hian 1986-87 bakah, 1989-90 season khan Serie A nomawi an chawi a, an club hian hei bak chu league nomawi chawi an la nei ngai lo a, an la chawi nawn leh lo bawk.