Barcelona chakna Lewandowski bawk!
Champions League group stage aṭanga tla hlim Barcelona-in European football an mangṭha hnua an match hmasa berah hnehna an chang lehnghal a, an mikhualna ramah team ṭha Valencia chu 1-0 in an hneh.
Mahse, Catalan club hian hnehna chang turin vanneihna an mamawh a, hun pek belh minute thumnaah goal an khung hram - goal khungtu hi tudang ni loin Robert Lewandowski bawk a ni.
Champions League aṭanga tla hlim ve tho Atletico Madrid erawh khualmualah an chak zo lo a, Cadiz lakah 3-2 in an tlawm - Atletico tan Joao Felix chuan goal hnih khung mah se, a team a chakpui zo lo.
Cadiz tan hian Theo Bongonda, Alex Fernandez leh Ruben Sobrino ten goal khat ṭheuh an khung. Nizan khan hmahruaitu Real Madrid an inlan a, he thu buatsaih a nih lai hian an result kan hre hman lo.
Vanduai vannei!
Valencia khelmual, Mestalla Stadium-a inkhelah Barca-in inkhel an thunun zawk a, heti chung hian chak turin vanneihna an mamawh - chawlhlawk hmain Lewandowski chuan goal hmahruai khungna remchang a nei a, mahse, post a tauh per.
Mualneitu Valencia-in goal khung hmasakna remchang an nei ve tho a, mahse, an chhawr thei lo. Centre back Gabriel Paulista chuan a tauh goal ngei dawn nia a lan hnuah, holam takin a chance neih a khawhral.
Chawlhlawk hman a nih hnuah Valencia tan Samuel Dias Lino chuan goal a khung ngeiah a inngai a, mahse, handball vangin pawmsak an ni lo a, an vanduai takzet.
Team pahnih hi point insemin an ṭin mai dawn niin a lang hman. Mahse, hun pek belh minute thumnaah Lewandowski chuan Raphinha siamsak chu a tlawh goal a, vannei takin 1-0 in an chak.
A hming Lewy
A hun têah Lewy-a'n goal a khung leh ta a, Real Madrid nena an inhnaihzia ngaihtuah chuan Barca tan vawi khat tlawm pawh a thiang tawh lo - Champions League aṭanga tla team hian La Liga-ah pawh nomawi an chawi loh chuan nipui laia risk la chunga an sum sen tam takten a tibuai thei tlat!
Lewy-a goal khung dan thlirin, Polish striker hi goal khung châka tuihal reng a ni, tih hmuh turin a awm leh ta a, Raphinha ball pek a ṭhat rualin, harsa taka a tlawh hram dan en ila, he striker hian goal khung hram dan a ngaihtuah reng tih a lang.
Kum 34 mi striker hian Barca tan league match 12 khelin goal 13 a khung tawh a, inelna hrang hrangah match 17 khelin goal 18 a khung der tawh bawk - striker pangngai takin season khata an khung ang zat chu a khung der tawh!
Lewy hian Ballon d'Or dawn duhin Barca a pan a, mahse, a chance ti ṭha thei ber Champions League aṭangin an tla tawh - khawvel footballer ṭha ber chawimawina mitthla ngam turin league lamah chet ṭhat chhunzawm zel a mamawh.
Aw, Atletico!
Atletico-in mualpho takin Champions League an mangṭha a, coach Diego Simeone chuan a tan European football-a club inelna sang ber chu a nunrawn thu a sawi chhuak hial - league lama insiamṭha nghal tura beisei an ni a, mahse, Cadiz lakah an tlawm tlat!
Cadiz hian minute khatna leka Bongonda goal khung hmangin hma an hruai a, Alex Fernandez chuan minute 81-naah a khung leh bawk. La Liga table mawng lama awm hi awlsam takin an chak dawn niin a lang hman.
Mahse, Atletico beiseina siamsak turin Joao Felix chuan minute 85-na leh 89-naah si phurh a rawn sut a, bench aṭanga luhtir forward a vul hle - mahse, he goal hnih hi Atletico tana beiseina beidawnthlak siamsaktu mai a ni.
Hun pek belh minute kuanaah Sobrino chuan Cadiz tan goal rawn khungin Atletico a barakhaih a, mikhual team tan thawh leh ngaihna a awm tawh lo.