Man United chhandamtu Bruno Fernandes Solskjaer a thawk ṭha, Woodward-a chet a hun?
Ole Gunnar Solskjaer-a kaihhruaina hnuaiah Manchester United chu Premier League-ah pathumna an ni a, season tharah Champions League an khel dawn. Norwegian manager Solskjaer-a'n a naute pathumna a nihpui theih chhana mi pawimawh chu Bruno Fernandes a ni a - Portuguese midfielder hi United chhandamtu chu a ni.
Sir Alex thlaktute
Manchester United-in 2012-13 season khan Premier League nomawi a vawi 13 nan an chawi a, Sir Alex Ferguson-a'n manager hna a chawlhsan thu a puang. Sir Alex thlaktu David Moyes-a'n season khat a daih lo a, Ryan Giggs-a hoin pasarihna ni chungin season an khar.
United-in tawnhriat ngah manager an zawn avangin Giggs chungah mawhphurhna an pe ngam lo a, Louis van Gaal an lalut. Dutch manager hnuaia season hmasa berah (2014–15) league-ah palina an ni a, nomawi an chawi lo. Van Gaal-a'n season hnihnaah pangana a nihpui a, Champions League khelh duh United hruaituten FA Cup-ah an champion chungin manager an ban.
Nomawi keng tel Jose Mourinho an lalut a, Portuguese manager hnuaiah parukna ni mah se League Cup leh Europa League nomawi a chawipui a. Europa League an champion avangin Champions League an khel pha bawk. Mourinho hnuaiah beiseina sang chhoin 2017–18 season league-ah pahnihna ni mah se Pep Guardiola kaihhruai Manchester City an phak lohna chu point 19 a ni.
Old Trafford-ah Mourinho-a'n season thumna a hmang a, club leh manager inkar a khi ṭan. United thuneituten Portuguese manager an ring zo lo a, centre back an laksak duh lo. Result a ṭhat loh zui avangin December 18-ah Mourinho an ban a, manager lailawk atan Ole Gunnar Solskjaer an lalut.
Norwegian manager-in bul a ṭan fuh a, amaherawhchu March 28-a dah nghet a nih hnuah chak a harsat. Hemi hnu hian league match riat khel lehin vawi hnih chakin vawi li an chak lo a, vawi hnih inhnehtawkin point 24 hmuh theih aṭangin point riat chauh an hmu. United-in parukna nichungin season an khar a, palina Tottenham an phak lohna chu point nga a ni.
A fawng chelhtu Ole
Ole Gunnar Solskjaer-a'n season tawp a khar ṭhat loh avangin rinhlelhna a awm a, chutihrualin Norwegian manager erawhin a hna a chan lo - thlakna tur ṭha bik an awm loh vang pawh a tih theih ang. United thuneituten Solskjaer hi Harry Maguire, Aaron Wan-Bissaka leh Daniel James te an leisak a, tlarhnung thawm ṭhat hna thawk mah se ball sem tur midfielder erawh an leisak lo.
United-in season ṭanna inkhelah Chelsea chu Old Trafford-ah 4-0 zetin an sawp. Amaherawhchu Solskjaer hian Romelu Lukaku leh Alexis Sanchez te Inter Milan lamah a kaltir a, thlakna tur ṭha a lalut lo. English club-in striker tawnhriat nei ṭha an nei lo a, Anthony Martial chu 'target man' atan chher chawp a ni a, Daniel James tlan chak mah se finishing ṭha a la nei lo a, Mason Greenwood a la naupang si, mawhphurna la turin Marcus Rashford a la ṭha tawk lo bawk.
Hei chauh hi a ni lo, Paul Pogba a inhliam hnu phei chuan United-in midfield khaipa an nei lo. Fred leh Scott McTominay ten hmun pawimawh an chang chho a, danglamna thlen tur khawpin an ṭha tawk lo. Andreas Pereira pawh khelhna hmun pek ni mah se a tikimtu chauh a tih theih a, United tlarhma a naran tih chu league-a an dinhmunin a sawifiah.
Chelsea an sawp avangin pahnihna dinhmun an luah zawk hnuah tlak hniam lam an pan ngar ngar a, October 20-a Liverpool nen an inhnehtawk zawhah phei chuan 14-naah awmin table-a an tlak hniam ber lai an tawng. United vanneihna erawh Liverpool leh Manchester City te tih loh chu che ṭha fal an awm lo a, an elpui club dang pawhin point an hloh ve reng avangin season thara Europa League khelh beisei pha tawk velah an awm ve reng.
Krismas boruakah chet ṭhat lai nei bawk mah se match hnih lek inlan hnuah Paul Pogba a inhliam lehnghal a, January thlaa Tottenham nen an inhnehtawk ṭumin Marcus Rashford a inhliam zui. Manchester United-in thlasik bazar an hman ṭhat a ṭul a, an vanneihna erawh Sporting Lisbon captain Bruno Fernandes-a'n English club tana khelh a châk a, Odion Ighalo pawhin a club ṭan United tana a khelhna tur a nih chuan a hlawh tihniam a duh bawk.
United siamṭhatu Fernandes
Manchester United chuan January thla tawpah pound maktaduai 47-in Bruno Fernandes chu Sporting aṭangin an lalut fel a, Portuguese international hi a chet ṭhat dan a zirin a man hi pound maktaduai 67.7-ah a kai chho thei. Shanghai Shenhua aṭangin loan hmangin Ighalo an lalut a, United-in 'target man' an nei ta.
January thla tawpah hian United-in point 34 an hmu a, palinaah awmin pangana Tottenham nen an point hmuh zat a inang. Solskjaer-a hoten Chelsea an phak lohna chu point ruk a ni a, pathumna Leicester City nena an inkarah point 14 zet a awm bawk. United hi panganaah awm bawk mah se pathumna Foxes aiin 19-na Watford (23 points) an hnaih zawk.
February thla aṭangin Bruno Fernandes a rawn inlan ṭan a, Potuguese midfielder hmuhnawm nghal mah se Wolves nen goal awm loin an inhnehtawk. United inkhelah Fernandes-a'n hmuhnawm a rawn belh a, Chelsea nen an inkhelh ṭumah hnehna a rawn keng tel leh bawk. Frank Lampard-a hote an hneh ṭum hian Fernandes-a'n assist a nei a, UCL khela an elpui la ni tur Blues 2-0 in an hneh.
United-in Watford an hneh zui a, Everton nen inhnehtawk mah se an hmelma Manchester City hnehin an phur chho ta hle. Amaherawhchu Covid-19 vangin inkhelh chhunzawm theih a ni ta lo a, chuti chung chuan Europa League lamah an chet ṭhat tel avangin Fernandes leh Ighalo awm chu United tan malsawmna a ni.
Malsawmna Covid-19
Covid-19 vangin thla thum chuang chawlh a ni a, Marcus Rashford leh Paul Pogba an dam hman. Rawlthar duhawm Mason Greenwood-a'n a taksa rawn ti lian chhoin tharum a ngah sawt a, season chawhma lama chhuah duh thu sawi reng Pogba lah Fernandes awm hnua United-in a rilru put hmang a thlaktir a, Old Trafford chhuahsan tum thu a sawi ta lo.
Manchester United-in Covid-19 hnua an match hmasa berah Tottenham inhnehtawkpui mah se Sheffield United, Brighton & Hove Albion, Bournemouth leh Aston Villa te a zawn zatin an hneh. Ole Gunnar Solskjaer-a'n 4-2-3-1 formation hmangin football hmuhnawm an khel a, January thlaa Champions League khelh beisei ṭha ngam tawh lo United boss-in pathumna a sawi ri ta.
Amaherawhchu hun pawimawhah United an chesual a, Southampton nen an inhnehtawk - Luke Shaw a inhliam bawk. Solskjaer-a'n chhawr ngam bik player a neih avangin United player-te an chau tawngkhawng a, an squad panna lang chhoin FA Cup semifinal-ah Chelsea hneh loin an tla. League-ah Crystal Palace an hneh hnuah West Ham United nen an inhnehtawk a, league match khar nan Leicester City nen final tluk zeta pawimawh an khelh a ṭul phah. King Power Stadium-ah United an vannei a, Fernandes-a penalty leh Jesse Lingard-a goal hmangin Leicester City 2-0 a hnehin season tharah UEFA Champions League an khel dawn.
Woodward-a chet a hun
Leicester City laka Bruno Fernandes-a penalty a pawimawh a, hetiang chiah hian Portuguese midfielder hi United tan a pawimawh. Fernandes-a awm hnuah United-in league-ah chak loh an nei tawh lo a, match 14 aṭangin vawi 9 zet an chak zarah Champions League-ah a inlan ang.
Chutihrualin manager Ole Gunnar Solskjaer pawhin fak a phu - United kal phung rawn chawi nung lehin academy player a chhawr ngam a, league-ah pathumna an ni pha bawk. Norwegian manager chuan, "Football expert-te beisei ang chu a ni lo. Parukna emaw pasarihna emaw in beisei a, pathumna kan ni ta si," tiin an thlen chin chu hlawhtlinna a nih thu a sawi.
United hi pathumnaah awm bawk mah se point 66 chauh an hmu a, season liam taa parukna an nih ṭuma an point hmuh zat ang tho a ni. Solskjaer-a hote hian an chunga awm Liverpool leh Manchester City an phak lohna hi point 33 leh 15 a ni a, an inkar tizim tura hmalak a ṭul dawn. United siam ṭha turin club chief executive Ed Woodward chet a hun ta chiah.
Red Devils hian Champions League an khelh dawn avangin player ṭha pathum emaw tal an mamawh dawn a, transfer-ah thawm nei ring tura ngaih ni mah se Woodward hian player lak kawngah tun hmaa United chief executive David Gill a tluk lo hle. Chutichung chuan tun nipui transfer-ah erawh United ṭantuten Woodward lakah beiseina an nei sang ang.
English club hi Borussia Dortmund winger Jadon Sancho nen sawi zawm a ni a, German club hian a man tihhniam an tum lo. Kum 20 mi Sancho hi United tana ṭha ber tura ngaih a ni a, chutihrualin Bayern Munich-in Leroy Sane an lak tak avangin Kingsley Coman sawi rik a ni bawk. Midfield-ah Fernandes leh Pogba te rintlak mah se Nemanja Matic upatna a lang leh ṭhin a, United hian midfied laia khel tur lakluh tur an melh ang. Tlarhnung lamah United-in sum seng tam tawh mah se Victor Lindelof hi champion pui tur khawpa ṭha tawk loa ngaih a nih avangin a thlakna tur an zawng ngei ang.
Premier League-a Manchester United player inlante
Goalkeeper & Defenders
Hming App Clean Goals
Sheet
David de Gea 38 13 0
Harry Maguire 38 0 0
Victor Lindelof 35 12 1
Aaron Wan-Bissaka 35 11 0
Luke Shaw 24 7 0
Brandon Williams 17 4 1
Axel Tuanzebe 5 0 0
Eric Bailly 4 1 0
Diogo Dalot 4 0 0
Timothy Fosu-Mensah 3 1 0
Marcos Rojo 3 0 0
Phil Jones 2 0 0
Midfielders & Forwards
Hming App Goals Assists
Daniel James 33 3 6
Anthony Martial 32 17 6
Marcus Rashford 31 17 7
Mason Greenwood 31 10 1
Fred 29 0 0
Scott Mc Tominay 27 4 1
Andreas Pereira 25 1 3
Jesse Lingard 22 1 0
Nemanja Matic 21 0 2
Juan Mata 19 0 2
Paul Pogba 16 1 3
Bruno Fernandes 14 8 7
Odion Ighalo 11 0 0
Tahith Chong 3 0 0
James Garner 1 0 0