South American club ṭha ber Flamengo

Football thiam tamna khawmualpui, South America-a club inelna sang ber Copa Libertadores final chu Inrinni zan khan khelh a ni a, Brazilian club pahnih intawnnaah Flamengo chuan 1-0 a Athletico Paranaense hnehin champion nomawi an chawi.

Paranaense lamin goal khung theihna remchang nei hmasa mah se Alex Santana chuan hnai set sawt aṭangin an chance neih a chhawr thei lo a, minute 43-naah Pedro Henrique chu a yellow card pahnihna avanga hnawhchhuah a nih zui avangin an dinhmun a ṭha lo zui.

Flamengo-in a tam zawk an nih chhawr turin hun an mamawh rei lo - Gabriel Barbosa chuan first half hun pek belh minute linaah goal a khung a, hun tawp thlenga goal dang lut tawh loin Flamengo an champion.

Goal a khung theih em avanga 'Gabigol' hming lem an pek, Gabriel Barbosa hian goal dang khung theihna remchang pawh a nei a, a chance neih a chhawr thei lo thung. Mahse, South American Champions League-a Flamengo an champion theih nan hian goal ruk a khung tho.

Kum 26 mi striker hian tun season-ah Flamengo tan match 62 zet khel tawhin, goal 29 a khung a, assist vawi nga a nei bawk.

Flamengo tan tun season hi Copa Libertadores nomawi an chawi vawi thumna a ni a, kum 1981 leh 2019 khan an lo champion tawh.

Hetihlai hian an hneh tak Paranaense erawh kum 2005 final-a Sao Paulo an ngam loh hnua final an khelh leh hmasak berah an tlawm leh ta - he inelnaah hian an la champion ngai lo a, final an khelh vawi hnihah an tlawm ve ve.

Manchester City midfielder hlui Fernandinho hoa inlan Paranaense hi Brazil leh Chelsea boss hlui Luiz Felipe Scolari enkawl an ni.