A chung berah Bayern

Bayern Munich-in Inrinni zan khan Mainz 6-2 in an sawp a, Bundesliga hmahruaitu an ni leh ta. Bavarians hian match 12 aṭangin point 25 an hmu a, champion nomawi humhim turin dinhmun an insiamrem chho mek. Nizan khan Union Berlin-in Borussia Monchengladbach an mikhual a, result a zirin table a la danglam thei thung.

Julian Nagelsmann-a hote hian minute ngana lekah Serge Gnabry hmangin an khung a; Jamal Musiala (28'), Sadio Mane (43'), Leon Goretzka (58'), Mathys Tel (79') leh Eric Maxim Choupo-Moting (86') te hmangin a khat mawi tawkin a khung leh bawk.

Mainz hian 3-0 a an hnufual laiin Silvan Widmer hmangin siphurh an sut ṭhen a, 5-1 a nih laiin Marcus Ingvartsen hmanga khung leh mah se an goal hnih hian mualphona a hliah khung zo lo.

Inkhel dangah Borussia Dortmund tan Jude Bellingham a vul a, English midfielder hian Eintracht Frankfurt lakah chakna goal khungin 2-1 in hnehna an chang. Deutsche Bank Park-ah Dortmund-in Julian Brandt hmangin minute 20-naah an khung hmasa a, Daichi Kamada hmangin minute ruk hnuah mualneituin khung mah se second half-ah Bellingham-a'n goal pawimawh a khung.

Kum 19 mi Bellingham hian tun season-ah goal riat a khung tawh a, heng zingah hian Champions League-a goal li a khung a tel. English midfielder Jude hian rimtu a ngah a, a theihna a san bakah a kum a la naupan bawk avangin khawvel midfielder manto ber ni thei dinhmunah a ding.