PSG tan Messi, Neymar leh Mbappe an inlar

Lionel Messi, Kylian Mbappe leh Neymar te an awm miau a, team dang tan chuan hmachhawn an harsa a ni. Paris St-Germain hmatawng pathum hian goal an khung vek a, an khingpui Troyes chu 4-3 in an hneh.

Inrinni zan Paris khawpuia inkhelah, mualneitu PSG an chesual hmasa. Minute thumna lekah Mama Balde hmangin goal an khung a, mahse chawlhlawk hmain Carlos Soler chuan si phurh a sut.

Second half-ah pawh Troyes bawkin Balde hmang vekin hma an hruai nawn a, mahse Messi-a'n a sut. Defender Sergio Ramos-a ball pek naran chu Messi-a'n yard 25 vela hla aṭangin a pet lut pawp a, Argentina captain hian Neymar khung tur a siamsak zui bawk.

Dinhmun ṭhaa an din hnuah Soler-a penalty hlawhchhuah chu Mbappe-a'n a khung belh a, hun tawp dawnah Troyes tan Ante Palaversa-a'n khung ve leh mah se awmzia a nei phak tawh lo.

PSG hian Ligue 1 match 13 aṭangin point 35 an hmu a, table hmahruaitu an ni. Anmahni hnaih bertu Lens aiin point ngain an sang zawk a, champion tura rinkai leh nomawi kawl mektu ni mah se, awlsam takin league title an la mai dawn bik lo niin a lang.

French champion PSG coach Christophe Galtier chuan, "Goal thum kan chhuah a, kan khelmuala khel kan ni bawk a, kan goal chhuah kha a tam mah mah. Siamṭhat ngai lai kan nei tihna a ni a, a rang thei ang berin kan che nghal dawn.

"Player tin an thawkrim em em a, an taksa pawh a chau tawh. World Cup hmain match khelh hmabak kan la nei nual, chumi atan chuan thiam taka kan insiamrem a ngai dawn a ni," tiin a sawi.

Tun karah Champions League an khelh leh nghal a ngai dawn. PSG hian tla chiang tawh Juventus an lenchilh dawn, tlang chiang tawh ni mah se group hmahruaitu ni turin Old Lady hneh a pawimawh, chuvangin Galtier-a'n a neih ṭhat a chhawr a ngai ang.