Mangṭha Bournemouth, Watford & Norwich Kan inhmuh, kan intawh leh hma zawng!

Pathianni zan Premier League inkhel result avangin Bournemouth leh Watford ten English top flight football an mangṭha ve leh ta a, an hma hian Norwich City chu an lo tla fel tawh bawk. 

Season hmasa Championship aṭanga Premier League inhlangkai team pathum zingah Norwich chiah tla awmchhun an ni - anni hi champion chunga Premier League khel an ni a, season khat bak an cham hman ta lo thung. 

Season hmasa Champion-ship-a pahnihna Sheffield United chuan pakuana nichungin top flight football-a an season an khar a, Aston Villa chu league tawp zanah an him hram bawk. Premier League club vantlang ni hman Bournemouth leh Watford ten division hniam lamah nungchan an zir thar a ngai dawn a, Norwich-in tha tharin Premier League khelh phak an tum leh a ngai bawk  - club pathum hi engtin tak awm zel ang maw?

Premier League aṭanga Bournemouth an tlak ruala rilrua lo lang hmasa ber Eddie Howe a ni a, kum 42 mi lek manager hi European club tam tak chil tiputtu a nih avangin Championship lamah lungawi takin a kal ang em? Thil sawi chian harsa tak a ni ta. 

Howe chuan, "Ka hma hun chungchang chu nidanga sawi atan khek theih a ni. Ka tih tur hmasa ber chu club neitu leh director-te nena titi ho a ni a, hmahthlir thui tak kan neih ho a ngai a ni," a ti a, Bournemouth chu Premier League-a kir leh ngei tura a duh thu a sawi bawk.

English manager Howe hian October 2012 aṭang khan Bournemouth enkawl hna hi a thawk ṭan a, League One club nichunga a enkawl hi Premier League club vantlang takah a chhuah thei - kum nga hnuah erawh an relegate ve leh ta. Howe chuan, "Ka career-a ka hun tawn thim ber ni hialin ka hria a ni. Player-te pawhin hrehawm an ti takzet. Premier League kan inhamtan theih loh avangin thupha ka chawi a, manager ka nihna angin mawhphurhna ka la a ni," a ti.

 

Premier League aṭangin Watford an tla a, fan-ten mittui nen an team an thlir mek laiin captain Troy Deeney chuan a hma hun chian loh thu a sawi zui - Watford fans tan ni hriatreng tlak a ni lo. 

Deeney chuan, "Watford tana ka game hnuhnung ber ka khel nge, Premier League-a ka match hnuhnung ber ka khel zawk pawh ka hre lo. Football-ah chuan thil eng pawh thleng thei a ni a, he hmunah hian kum 10 ka cham tawh. Ka chhuah a hun a nih chuan dal theih a ni lo ang," a ti. 

Kum 32 mi striker hian Watford tan inelna hrang hrangah match 398 khelin goal 133-a khung a, tun season Premier League-ah match 27 khelin goal 10 a khung bawk - Watford tan chuan player hlu bik a ni. Hornets hian tun season-a league match hnih chauh khelh tur an la neih laiin coach Nigel Pearson an ban a, Hayden Mullins chuan match hnih hi a enkawl lailawk - Pearson hma hian Javi Gracia leh Quique Sanchez Flores an ban tawh bawk a, tun season-ah coach pathum an ban hman!

Premier League-a match thum khelh hmabak an la neih laiin Norwich City an relegate fel der tawh a, coach Daniel Farke chuan a rang thei ang bera insiamṭha tura hma an lak nghal thu a sawi. 

Farke chuan, "Kan chetsualna te rang taka inzir a, insiamṭhat vat kan mamawh. Kan relegate tih hi huaisen takin pawm ila, hma lam hun êng takin thlir ang u," a ti a, indawmkun reng a tum lo. Norwich hi transfer bazar-ah pawh muan an tum lo. Danish midfielder Jacob Sorensen chu kum thum chhung atan contract an ziahpui a, Danish top-flight club Esbjerg aṭanga an lakluh player hi kum 22 mi chauh a la nih avangin hmabak a nei êng hle. 

Canaries winger Onel Hernández chuan, "Hei aia ṭha zawkin kan lo kir leh ang. Championship kan khel ang a, a rang thei ang berin Premier League-ah lo kir kan tum ang," tiin a sawi ve bawk.