Goal khung thiam Liverpool an chak
Inrinni zan Premier League inkhelah Liverpool-in goal khung an thiamzia an pholang a, an mikhualna ramah West Ham United chu 4-1 in an sawp. Reds tan Mohamed Salah chuan goal hnih a khung a, Joel Matip leh Alex Oxlade-Chamberlain ten goal khat ve ve an thawh bawk.
Hammers erawh hnehna an chan zawh loh avangin 17-na dinhmunah an awm a, relegation zone aṭanga an himna chu point khat chiah a ni. West Ham boss Slaven Bilic chuan, "Game tinah hian ka phurrit a zual zel a, tunah phei chuan a nasa lehzual. Club hi kan zavaia chunga leng an ni a, an thutlukna thlir chiah kan hmabak a ni," tiin a dinhmun a him loh thu a pha lo.
Goal a sur
Season ṭan tir aṭangin Liverpool tlarhmain sawi an hlawh a, chance pawh an insiam hnem - mah se an finishing tawih tawk loh avangin chance ngah ang huin goal an khung thei lo a, an tlarhnung a pawp bawk si avangin an talbuai fo. Reds-in an match hnuhnung pathumah erawh goal khung an thiam tih an pholang a, tlarhnung an venghim tel bawk - Hammers an sawp hma hian Huddersfield leh Maribor chu 3-0 ve vein an sawp a, Liverpool ṭantute hlim takin an zai ve leh ta.
Liverpool ṭantute tana thu hriat nuam em em tur chu an chance neihah Reds an talbuai tawh lo - first half-a goal zawna shot an neih pathum zinga pahnih chuan net a tawn puar a, Salah leh Joel Matip-te khung a ni. Hammers beiseina chhi nung turin Manuel Lanzini chuan minute 55-naah khung ve mah se minute khat pawh a liam hmain Chamberlain chuan Reds tan Premier League-a a goal khung hmasak ber hmangin a chhanglet a, Salah chuan a goal hnihna a khung zui bawk.
Mane a lo kir
October thlatira a malpui hliam avanga a chawlh reng hnuah Reds tan Sadio Mane a lo kir leh ta a, Senegal international hian Liverpool tana player ṭangkai a nihzia a pholang lehnghal - a tlanchakna leh tharum ngahna chu Hammers tlarhnung tan buaipui tham a ni a, Salah goal khung pahnih hi a ke aṭanga chhuak ve ve a ni bawk.
Liverpool boss Jurgen Klopp chuan, "Training session vawi khat chiah a nei hman tihin Sadio chhawr tur hian thutlukna ka siam a, hetiang anga thutlukna rang hi tun hma zawngin ka siam ngai lo. Mahse, thutlukna chhe tak a ni hran lo tih kan hmu vek. Sadio hi chu training kher lo pawhin a fit a, amah hi khawl ang mai a ni," tiin a player a chhuang hle.
Man tlawm Salah?
Nipui transfer laiin Liverpool-in AS Roma aṭangin Mohamed Salah an lalut a, a man atana an insen zat chu pound maktaduai 34 a ni. Chelsea-a lo hlawhchham tawh laka Reds insen ngam ngaihna zat hi mipuiin rin dan thiam a har an ti a, tunah erawh Egypt international hi Liverpool-in man tlawm takin an lei tih hi football khawvel pawm dan a ni ta.
Kum 25 mi forward hian Liverpool tan tun season-ah goal 15-ah ngawt tha a thawh ta a, Reds tan a match hnuhnung panga aṭangin goal ruk a khung tawh. Liverpool boss Klopp chuan, "Counter-attacking kan neih dan kha duhthusam a ni a, hmuhnawm takin kan khel a ni. Tun kar chhungin 30, 3-0 leh 4-1 in kan chak a, kan tan chuan kar duhawm tak a ni," tiin a hlim hle.
Inkhel chhehvel
Hammers khelmuala an zin hnuhnung pahnihah Liverpool-in goal riat an khung a, West Ham hian heti zat tho goal hi an khelmuala an league match hnuhnung pakuaah an khung!
Liverpool-in Klopp kaihhruaina hnuaiah match 14-ah goal lia aia tam an khung tawh a, Klopp-a'n Reds a kaihhruai hnua an tluk loh chu Manchester City (16) leh Tottenham Hotspur (16) an ni. Reds tana a Premier League match hmasa 11-a goal kuaah (goal sarih, assist pahnih) Mohamed Salah-a inrawlh a, Daniel Sturridge chiah a tluk lo (11 games, 10 goals) August 2016-a Reds tana a khelh hnuah Sadio Mane aia Liverpool goal-a inrlawh hnem an awm lo (23 - 16 goals, seven assists) Joe Hart-a'n Premier League match 18-a Liverpool a hmachhawnah goal 33 a chhuah a, club pakhat laka heti zat goal chhuahna dang a nei lo.
Inkhel Results
Stoke City 2 - 2 Leicester City
Huddersfield Town 1 - 0 West Brom
Newcastle United 0 - 1 AFC Bournemouth
Southampton 0 - 1 Burnley
Swansea City 0 - 1 Brighton & Hove Albion
West Ham United 1 - 4 Liverpool