Cavani-a'n PSG tan goal 100 khung tling

Edinson Cavani chuan Paris St-Germain tan French Ligue 1 match 144 a khelh

aṭangin goal 101 a khung tling ta. Inrinni zan inkhelah Cavani hian goal hnih khungin PSG hi Angers lakah 5-0 in hnehna a chanpui.

Paris club tan hian Uruguay international Cavani bakah hian rawlthar duhawm Kylian Mbappe chuan goal hnih a khung a, Germany international midfielder Julian Draxler chuan goal khat a thawh ve bawk.

PSG hian malpui hliam vangin pound maktaduai 200 zeta an lakluh Neymar an chhawr thei lo a, fa an neih vangin Marquinhos leh Angel Di Mari te chu chawlh pek an ni bawk; heti chuang hian gaoal khung kawngah harsatna an tawk lo.

Team a pawimawh

Zlatan Ibrahimovic a awm lai kha chuan PSG tan Swede strker hi rinrawl a ni a, a chhuah hnuah erawh Cavani hi goal thun khawl a ni mek. Napoli striker hlui Cavani hian season hmasa khan league goal 35 a khung a, season kal laiah pawh match 11 a khelhah goal 13 a khung leh der tawh; a khung belh zel pawhin a rinawm hle.

Kum 30 mi Cavani chuan, "Team tan ka theihna zawng zawngin ka khel a, chu chu football khelh dan tur dik ni pawhin ka hria. Mimal hmingṭhatna hi ka ngaihpawimawh a ni lo a, team kan nih avangin thawhhona ṭha a hlu a ni," tiin mimal aia team a dah pawimawh thu a sawi.

PSG manager Emery chuan, "Striker tan thil pawimawh chu goal khung theihna hun ṭha neih a ni, an khung nge an hlah chu sawi theih a ni tawh lo. Cavani leh Mbappe ten an hun neih an hlah lo a, kan lawm tlang tur a ni," tiin a sawi.

Unai Emery naute hian match 12 khelhah point 32 hmuin league hmahruaitu an nih chhunzawm a, an hnuai chiahah hian champion lai Monaco chuan khelh zat inangah point 28 an hmu thung - PSG leh Monaco te hi November 27 hian an intawng ang.

Jardim a buai lo

Inrinni zan inkhel dangah nomawi kawltu Monaco chuan an mikhual Guingamp lakah ṭhat chhuah duh loin 6-0 ngawtin an sawp a, hnehna an chan hnuah Monaco manager Leonardo Jardim chuan PSG nena an inum boruak chuan a tihbuai loh thu a sawi.

Leonardo Jardim chuan, "Match 12 an khelh hnuah PSG hi a chung berah an awm a, midang chunga an awm theih vangin team ṭha an nih zia chu sawi nawn a ngai lo. Paris nen kan inkarah point li a awm a, kan intawn hunah tihzim ngei kan tum ang," tiin season hmasa lama nomawi an chhuhsak lakah tlawm a tum lo.

Portuguese manager Jardim hian ṭhang-khat lian zet hnuah season hmasa khan Monaco chu league nomawi a chawi pui bakah Champions League semifinal a hruai thleng. Hlawhtlinna an chan theih nana player pawimawh Mbappe chu PSG lamin an chhuhsak a, club pahnih intawn hunah boruak a dai lo ang.

Inkhel Results

Angers 0 - 5 PSG

Monaco 6 - 0 Guingamp

Montpellier 1 - 1 Amiens

Nantes 2 - 1 Toulouse

Troyes 3 - 0 Strasbourg