GSP a la chuai lo, a ropui zual zel

Kum li chhungin Ulti­mate Fighting Championship (UFC)-ah thil tam tak dang­lam mah se Georges St-Pierre erawh world champion a la ni reng. Kum 36 mi GSP-a hian kum li chhung UFC a bansan hnuah Pathianni khan a rawn kir leh a, Michael Bisping hnehin UFC Middleweight champion a ni.

GSP-a hian November 16, 2013 khan split decision-in Johny Hendricks a hneh a, UFC welterweight title chu humhimin hemi hnua a inlan leh hmasak berah a category fight-na ṭhin aia sang middleweight-ah hnehna a chang a, technical submission hmangin a chak.

Canadian fighter GSP hian hun rei tak chawl mah se Bisping aiin skills leh technique-ah a la ṭha zawk a, ama weightclass aia sang a rawn let a nih avangin minute 25 (round 5) khelh chu ṭul se a talbuai theih a rinawm. Engpawh nise octagon chhung a nih chuan GSP a la ṭha tawk a, a record 26-2 hi chhuanpui tham a tling.

UFC Middleweight cham­pion thar GSP-a chuan, "Ka suangtuahna ram a thleng dik a, a bak han sawi belh tur chuang pawh ka hre lo," tiin a sawi.

Fight dang

UFC 217 chu Madison Square Garden, New York-ah neih a ni a, title fight pathum awmin champion lai chak zo an awm lo. Bantamweight-ah T.J. Dillashaw chuan round hnihna lekah Cody Garbrandt chu a knockout. Kum 31 mi Dillashaw hian hnehna chang turin vanneihna a mamawh a, round khatnaah Cody hian pet tlu mah se hun a tawp zui avangin insiamremna hun a nei a, round hnihnaah American fighter Dillashaw hian a hnek tlu a, bawhzui nghalin hnehna a chang.

Hmeichhe Strawweight champion lai Joanna Jedrze­jczyk chuan Rose Namajunas lakah minute 3:03 chhung lekin a title a hloh hman. Kum 25 mi Namajunas hi UFC fighter lar Ronda Rousey hnung zui a, lar chho thei tura ngaih a ni.