Wilder-a'n Joshua a cho

WBC heavyweight champion Deontay Wilder chuan a kawnghren kawl lai humhim tura Bermane Stiverne a knockout hnuah Anthony Joshua chona thu a chhak chhuak nghal a, kum 32 mi boxer chuan, "I lakah hian indona ka puang a ni," tiin British boxer hi a cho hle.

Wilder hian Stiverne tukdawl tur hian hun a duh rei lo - round khatnaah a kut dinglamin na zetin a hnek a, lu haia Stiverne tlu lai chu a duhtawkin a hnek zui bawk. Wilder chuan, "Khawvela a ṭha ber ka ni tih ka hria a, ka hmaa fiahna hmachhawn turin i ding ngam em?" tiin WBA leh IBF heavy­weight champion Joshua a cho.

Hetihlai hian Birtish boxer Dillian Whyte chuan Wilder hmachhawn hi a lo inbeisei ve mek bawk a, mahse December 2015-a Joshua a hneh loh hnua vawi ruk a zawna chak tawh Whyte hi Wil­der-a'n hmachhawn a tum lo.

American boxer chuan, "Lal-in a hnuaia mi a hmachhawn ngai lo. Lal chuan amah ang thoa Lal ropui hmachhawn a duh a, ka duh chu Joshua a ni. Joshua a hun leh ni tur chu tichiang la, khawvela ṭha ber chu hre thuai ang," tiin a cho hle.

The Bronze Bomber tia hming lem an pek Wilder hian inhnek a hma­chhawn tawh vawi 39-ah hnehna a chang vek a, chung zinga 38 chu a knockout. Anthony Joshua-a'n vawi 20 in­hnek a hmachhawnah a khingpui a knockout vek thung - boxer pahnih hi an inhmachhawn a nih chuan a hmuhnawm khawp ang.