Barcelona chakna Paco Alcacer

Lionel Messi leh Luis Suarez ten goal an khung loh zanah an kianga khel Paco Alcacer chuan goal hnih khungin Barcelona chu Sevilla lakah 2-1 in hnehna a chanpui.

Catalan club hian La Liga season kal laiah hneh loh an la tawng lo, point 31 hmuin pahnihna Valencia aiin point liin an sang zawk.

Inrinni zan Nou Camp-a inkhelah kum 24 mi Alcacer hian minute 23-naah Uruguay international striker Suarez-a long ball pek hmang ṭangkaiin goal hmahruai a khung. Second half-ah mikhual Sevilla hian Guido Pizarro-a tauh luh hmangin sut ve mah se Ivan Rakitic thawhrah sengin Alcacer chuan chakna goal a khung leh a ni.

Valencia leh Getafe forward hlui Alcacer hian hattrick siam theihna hun ṭha neiin hnai tak aṭangin a tauh over a, defender Gerard Pique pawhin crossbar hrulah a hlap chhuak bawk.

Barca manager Ernesto Valverde chuan, "Paco Alcacer khan goal khung chi player a nih zia a lantir ta. Khelhpui tur player ṭha tak a nei tih chu hriat sa a ni a, chutih rualin khelmual chhunga a chet danah khan player ṭha leh theihna nei sang a ni tih a hriat theih," tiin a player thar a fak hle.

Valencia aṭanga inzir chhuak Paco Alcacer hian season hmasa nipui trasfer lai khan Barcelona a zawm a, mahse intuaihriam turin loan hmanga chhuahtir nghal a ni–kuminah an ko kir a, season ṭanni khan Real Betis lakah bul ṭantir niin tun ṭum hi inkhel bul a ṭan lehna chiah a ni.

Barca thiampuipa Messi-a'n a thiamna hmangin Sevilla tlarhnung a chhaih buai fo a, goal hmaah erawh Argentine forward a vannei bik lo. Messi hian lei hrulah mawi zetin hlap mah se goalkeeper David Soria-a'n ṭha zetin a dan sak a ni. Barcelona keeper Marc-Andre ter Stegen pawhin Luis Muriel leh Nelson Semedo te lakah fiahna hautak a paltlang ve bawk.

Goal 30 khung Valencia

Inkhel dangah Barcelona ang bawka hneh loh nei loa season hmang lai Valencia leh Atletico Madrid te chuan hnehna an chang ve leh bawk. Valencia hian Dani Parejo, Rodrigo leh Santi Mina te goal hmangin Leganes 3-0 in an sawp a, tun season chhungin an team-in league goal 30 an khungna niin Barcelona nen an khung zat a intluk.

Diego Simeone kaihhruaina hnuaia khel Atletico Madrid chuan tun season chhunga a vawi ruk nan an khingpui an inhnehtawk pui leh ngei dawna a lan hnuah hun tawp dawna Thomas Partey goal hmangin Deportivo La Coruna 1-0 in an hneh.

Atletico Madrid manager Simeone-a'n a player duhlai Antoine Griezmann chu minute 80-naah la chhuakin Argentine forward Angel Correa a dah lut, goal an mamawh lai taka an hmatawng hriam ber pakhat Griezmann a la chhuak hian sawi zui a hlawh hle.

Argentine manager Simeone chuan, "Kan inkhel kha hriatthiam a harsa hle a, goal kan neih theih dan tur nia ka hriat chu midfield lam thuam chhak kha a ni. Saul, Nicolas Gaitan leh Kevin Gameiro te thahrui ti chak zual thei tura ka ngaih avangin Correa kha luhtir ka ni. Griezmann hi kan tan player pawimawh a ni a, goal a khung loh ni pawha chakna goal khung thei tur player dang kan nei hi kan vannei zawk a ni," tiin a sawi.

France international Griezmann hian nipui lai khan Manchester United a zawm hman teuh hle. Mahse, Atletico hian hrem an tawh avangin player thar an lalut thei lo a, club-in harsatna a tawh laia chhuahsan a duh lo. Griezmann hian tun hnaiah a zawnin match sarih chhung goal a khung tawh lo a ni.

Inkhel Results

Barcelona 2–1 Sevilla

Valencia 3–0 Leganes

Dep La Coruna 0–1 Atl Madrid

Alaves 1–0 Espanyol