September 12-ah EPL ṭan dawn

Premier League 2020-2021 season chu September 12 aṭangin khelh ṭan leh a ni dawn a, ruahmanna a kaltluang a nih chuan nakkum May 23-ah match hnuhnung ber khelh zawh a ni ang.

Pathianni zan khan EPL season kal lai chu a tawp a, engkim chinfel a ni tawh. Covid-19 vangin thla thum chuang chawlh lailawk a ngai a, league match hnuhnung lam hi a hmuna entu awm loa khelh zawh a ngai.

England-ah chuan kumin October thla thleng vel hi stadium chhungah mipui lut lo tura tih an ni a, sorkar lamin ruahmanna hi an siam danglam a nih loh chuan season thar tir lamah pawh a hmuna entu an awm thei dawn lo tihna a ni.

Premier League club zingah Manchester United leh Wolves ten Europa League khelh hmabak an la nei, inelna hi August 5 aṭanga chhunzawm tur niin final an lut a nih chuan August 21-ah an zo chauh ang. Manchester City leh Chelsea ten Champions League khelh chhunzawm tur an la nei ve thung, anni pahnih pawh an thleng sang a nih chuan a hranpaa season thar inbuatsaihna hun ang kha an nei mumal hman dawn meuh lo a ni. September thla hian England chuan Nations League an khel ṭan dawn bawk a, heng bakah hian EPL champion leh FA Cup champion ten an inchuh ṭhin Community Shield khelh hun tur erawh tih chian a la ni lo thung.