Arsenal an che rapthlak!
Premier League table chung ber chu Arsenal ta a ni. Manchester City-in luah hawh ve zauh mah se, khelh zat inangah Mikel Arteta naute hian champion lai Citizens nek chhuakin hmun chungnung ber an chang leh ta.
Gunners tan hian Reiss Nelson-a'n goal hnih bakah, Gabriel Martinelli, Thomas Partey leh Martin Odegaard te goal hmangin Nottingham Forest 5-0 in an sawp a, league match 12 aṭangin point 31 an hmu - pahnihna Man City aiin point hnihin an sang.
Laipui a puak
An league match hnuhnungah an chak zo lo a, Europa League khelin an tlawm zui bawk. PSV an hneh loh hnuah Arteta-a'n, "Kan thawh chhuah leh nghal a ngai," tiin a sawi, a sawi ang ngeiin khelmual chhungah a naute an harhvang ta hle.
Pathianni zan Emirates Stadium-a inkhelah, a tir aṭangin Arsenal an nung nghal phat. Minute ngana lekah Martinelli chuan Bukayo Saka siamsak a tauh lut, harsa leh rem lo deuh tak ni mah se Brazilian forward in a tauh lut thei tlat.
Hliam vangin Saka lak chhuah a ngai a, an player rinrawl a chhuah vangin Arsenal an hnual lo. Saka thlaktu Nelson-a'n goal hnih a rawn khung a, goal a khung chauh duhtawk loin Partey-a goal mawi tur a siamsak bawk.
Captain Odegaard pawhin, inkhel cheimawi chauh ni loin goal khung pawh a thiam tel tih a lantir, chiang zetin a hlap lut pawp. Arsenal hi table chung bera an lawn laiin, chak lo Nottingham erawh table mawngphahah an awm chhunzawm.
Champion tum
Season ṭan dawn khan chuan, champion thei tur zingah Arsenal hi dah teltu an tam lo ang. Tunah erawh an thil tih hmangin champion an tum ngam tih an lantir mek zel, an chak zawh loh hnua an thawh leh dan thlir chuan champion tum ngam tur an ni.
Gabriel Jesus-a'n tun hnaiah goal a khung lo, mahse Nelson leh Odegaard te khung tur a siamsak, heng bakah hian Nelson-a goal hmasa a luh theih chhan kha mahni hmasial lo tak a khelh vang a ni bawk, team tana a hna tawh sawi nep theih a ni lo.
William Saliba a rintlak a, a kawppui Gabriel pawh a khel chhe lo. Brazilian defender hi hun eng emaw laiin a chiai deuh ṭep ṭhin, thil dangah chuan a rintlak viau, inrintawkna a neih belh chuan Ben White te nena an inkawp hi suttlang an har zual ang.
Arteta rawn lan hnua Granit Xhaka danglamna sawi nawn a ngai lo. Swiss midfielder hi Thomas Partey nen an inkawprem takzet, anni pahnih hi hliam loa an khel reng thei a nih chuan an kulhpui nghet an ni zel ang, langsar si loa an chakna hnar an ni.
Saka dinhmun
Bukayo Saka hi kum 21 mi chauh a la ni a, a kum la tam lo mah se Arsenal leh England tan hmun pawimawh a chang phak. Forest defender Renan Lodi nen an intihpalh vangin a hliam a, khelmual a chhuahsan lai kha Arsenal chauh ni loin Three Lions fans tan en a nuam lo ang.
Zawhna chhangin Arteta chuan, "World Cup a nghawng loh ka beisei, a hliam dinhmun dik tak erawh ka la sawi mai thei bik lo. Ruh ni loin tihrawl ni maiin ka hria, hliam na dang a awm lo turah ka ngai.
"Player hlauhawm a nih avangin ven bik a ni ṭhin a, kan khingpuiten an beih ṭhin a nih avangin a dinhmun kha a ṭha lo," tiin a player Saka chungchang a sawi a, rei tak a chawl lo turah a ngai niin a lang.
Hmalam thlir zuiin Arteta chuan, "Premier League hmahruaitu nih chu a ropui, chutih rualin hmabak hautak tak kan nei," a ti. Ningani zanah FC Zurich an mikhual dawn a, kar tawpah Chelsea nen London Derby an khel zui nghal dawn a ni.