Reliance leh MFA thawhhona 'Naupang League' ; MFA nen kan thawhhona hian naupangte football zirna ṭha zawk a pe ang - Nita Ambani
Reliance Foundation leh Mizoram Football Association (MFA) chuan naupang football zirna tur, 'Naupang League' chu Mizoramah a kalpui dawn. Reliance Foundation Chairperson Nita M. Ambani chuan, MFA leh Reliance Foundation thawhhona hnuaiah naupangte'n football zirna ṭha zawk (high quality training) an neih ngei a beisei thu a sawi.
Naupang League
Reliance Industries Ltd (RIL) hnuaiah Reliance Foundation a awm a, chumi hnuaiah chuan peng hrang hrang a awm leh a, chumi zinga pakhat chu Reliance Foundation Young Champs a ni. Hei hi naupangte football zirna project lian tak a ni a, anni leh MFA thawk dunin Reliance Foundation Young Champs (RFYC) Naupang League kalpui a ni dawn ta a ni.
Hun rei deuh tak aṭangin inrawn khawmna kalpui a ni a, November thla chawnhu lamah Aizawl leh Champhai-ah bul ṭan a ni ang a, hei hi RFYC lam kalpui tur a ni ang.
Hetihlai hian RFYC hian MFA leh District Football Association-te nen ṭang dunin Kolasib leh Lunglei lamah naupang inelna hi an kalpui bawk dawn a, a kalphung erawh a dang hret ang.
Nita Ambani thu leh hla
Reliance Foundation hotu lu ber Nita M. Ambani chuan, "Mizoramah chuan footbaall hi an nunphungah a bet a, an khawtlang nunah a tel ve tlat a ni. RFYC leh MFA thawhhona zarah mipa leh hmeichhe naupang talent nei ṭha tak takten football zirna ṭha leh changtlung zawk an nei dawn a ni," a ti.
Nita chuan, "Naupang tê zawkte'n kum nga vel an nih aṭangin inkhelhna hun ṭha an hmu dawn a, football-a inhmang nasa tak state Mizoram naupangte tana kawng inhawng tur hian min tiphur takzet a ni," a ti.
Nita Ambani chuan India ram pumah grassroots football hmasawnna tura tha thawh zel tura an inhawn thu a sawi
Inelna kalphung tur
Aizawl leh Champhaiah hian Under 5, Under 7, Under 9, Under 11 leh Under 13 pual league siam a ni ang a, team pakhat neituin heng kum bithliah team hi an neih kim a ngai ang. Sikul chawlh apiangin an inkhel ṭhin ang a, round 30 aia tlem lo khelh tur niin kum 2023 May thla vela zawh theih beisei a ni.
Inelna senso hi RFYC-in a tum dawn a, an jersey-te an tum dawn bakah mamawh ṭul dang (medical duty, ambulance, referee etc) pawh an pe vek ang a, a enkawltu tur bik an ruai dawn bawk a ni.
Kolasib leh Lungleiah pawh inelna hi tlema tihdanglam deuh leh zangkhai deuha kalpui tur a ni a; chutihlaiin RFYC aṭanga coach lo kalte'n a khat tawkin league khelhna hi an tlawh kual reng dawn a, player ṭha bik tan residential camp siam ṭhin a ni ang. Season tawpah player ṭha thlan chhuahte RFYC hmunpui Mumbai lamah inzir zel tura kalpui an ni ang.
League match khelh loh niin zing/tlai lamah naupangte tan training pek a ni ṭhin ang a, inkhel zawng zawng hi awmze neiin record tur a ni. He project kalpui pah hian coach education leh referee development project kalpui a ni ang.
Football kalphung thar
RFYC lam hian India rama football zirna hmun ṭha bera chhal ngam Mumbai-ah an kalpui mek a, naupang ṭha lak khawma training pek tlut tlut a pawimawh rualin a taka inkhelhtir a, chuta ṭanga naupang thiam thlan chhuah leh chu ṭha zawkin an ring. Hemi tur hian India ramah naupang pual football league kalpui a, chuta a ṭha thlan chhuah chu an tum - hun rei lo te trial neih chhunga thlan chhuah ni loin kum tluana inkhela a ṭha tih hriat sa lak khawma zirtir zel a, India football thlak danglam theih an inbeisei a ni.