India-in South Africa an ngam lo

T20 World Cup-ah India-in bul ṭan ṭha mah se Pathianni zan khan South Africa chu wicket ngain an hneh lo. Men in Blue-in bul an ṭan ṭha tawk lo a, hun chanve chhoah khel ṭha mah se a tawp an khar ṭhat loh avangin chak phu zawk Proteas-in hnehna an chang.

Super 12-ah hian team 12 an awm a, group hnihah paruk ve vea ṭhendarh niin group khat aṭangin pahnihin semifinal an lut dawn. Rohit Sharma hote hi pahnihna an la ni pha tho a, team ṭha pahnih South Africa leh Pakistan an hmachhawn tawh avangin knockout stage lut turin an dinhmun a ṭha.

Optus Stadium-ah India hi ṭhumvawrah an vannei a, Rohit-a'n vuak hmasak a thlang. India opener KL Rahul a che fuh thei lo a, run sarih chauh a siam. Captain Rohit (15) leh Virat Kohli (12) te pawhin run an tam an siam lo a, Suryakumar Yadav-a'n 68 runs a siam zarah India dinhmun a ziaawm.

Deepak Hooda-a'n duhsakna a dawn a hmang ṭha lo a, run khat pawh siam loin pavilion lamah a kir a; run siam kawngah tailender (batter ṭha lo, a tawp lama awm ho) ho an ṭangkai lo a, over 20-ah India-in 133/9 runs chauh an siam.

India dinhmun chhe hman mah se Arshdeep Singh, Mohammed Shami leh Hardik Pandya ten an vawm ṭhat avangin beiseina sang tak an nei hman a; mahse fielding ṭhat tawk loh an tuar. Virat Kohli-a'n ball a thlauh a, Bhuvneshwar Kumar leh Rohit ten run out theihna tur an hlah bawk avangin Proteas an ding chang ta zawk. Over 19.4-ah South Africa-in 137/5 runs siamin hnehna an chang a, David Miller (53*) leh Aiden Markram (53) te chu an chakna hnar a ni.