Paris St-Germain boruak a ṭha lo

Footballer manto ber Neymar chuan coach thu awih loin a piancham lawmna 'party' a buatsaih a, rawlthar duhawm Kylian Mbappe pawh puitling tawk tawha inngaiin khelmual chhungah thuneitu nihna chan a duh bawk - coach Thomas Tuchel lu a hai rih hle tura ngaih a ni.

French football journalist pakhat, party an neihna hmuna tel ve Julien Laurens chuan Neymar piancham an lawm dan chungchang a sawi chhuak a, European football expert Guillem Balague pawhin PSG chhungkaw boruak chu a sawi ve bawk.

Paris St-Germain hian February 1, Inrinni zan khan league match an khel a, February 5, Nilaini khan match an nei chhunzawm leh bawk. Match an neih inkar hi ni li chauh a ni a, a karah hian Neymar chuan nasa takin a piancham a lawm.

Laurens chuan, "Pathianni zan khan Paris khawpuiah mi an zi nuaih nuaih a, Nilaini khan Neymar chuan kum 28 a tling chiah. A lawmna hi Pathianni zan khan neih niin, mi 300-400 vel an awm, an chhungkua leh a ṭhian hnai tak tak, a inkhelhpui ṭhinte an ni a, thuamhnaw vara inthuam tura ngen an nih avangin an incheina chu a var vek.

"Lyon forward Memphis Depay pawh an elpui player piancham lawmnaah hian pheikhawk Rs 1,10,722 man bunin a inlan, a boruak a nuam hle. Zan dar 12 hma deuhin Neymar chuan thu tawite a sawi a, Barcelona a hmangaihna avang khan France khawpuiah a rilru zawng zawng a pek nghal theih lo thu a sawi a, tunah zet chuan Paris khawpuiah a hlim tawh thu a sawi bawk.

"Player tam zawk chu dar 1:00 hmaa hawin party a tawp meuh erawh chuan dar 3:00 a ni tawh. Season hmasa kha kan la hria ang a, Neymar kha a hliam avangin a piancham lawmnaah pawh nuamsa takin a che thei lo, kumin erawh a boruak a danglam ta hle," a ti.

Party-naah khan PSG coach Tuchel leh PSG sporting director Leonardo te chu an tel lo a, German coach hian a player thil tih chu match khelh hmabak an neih laia rilru pek lohzia lantirna tih hialin a sawisel, Brazil international hi Nantes lakah a inlan lo zui - a inlan loh chhan erawh hliam a neih vang nia sawi a ni.

Neymar hian 2017 khan Barcelona chhuahsanin PSG a pan a, hliam vanga a buai ngun avangin match a khel tam tawk lo. A inkhelh chhunah erawh a sulhnu a ṭha, match 76 aṭangin goal 66 zet a khung tawh - season kal lai bikah match 18 aṭangin goal 15 a khung thei.

Paris khawpuiah a hlim tawk loh thu a sawi fo a, a club hmasa lamah kir leh tur angin thawm pawh a awm ngun. Mahse, kir leh tur chuan Barcelona leh Neymar inremna chauh a tawk lo a, a club khelhna PSG nen an pathuma an inrem a ngai tawh.

European football expert Guillem Balague chuan, "Barcelona chuan Neymar hi hmin an tum, nipui laia laklet ngei an duh. Neymar pawhin kir leh a hreh lo, a nihna takah chuan Paris khawpuiah hian a rilru zawng zawngin a hlim ngai lo a ni," tiin a sawi.

Barcelona chuan Neymar man atan hian euro maktaduai 180 vel an phal nia sawi a ni, an hralhna pound maktaduai 200 aiin a hniam hle. PSG-in player awmṭha duh lo leh rilru nghet lo kawl reng ai chuan a duhna lamah an kaltir a nih pawhin a mak lo ang.

Nipui bazar inhawn lai khan Kylian Mbappe chu player sawi hlawh pawl a ni a, France international hi Real Madrid nen nasa taka sawizawm a ni. Mahse, Mbappe hi a chhuak lo a, season an ṭhan hma khan 'Thuneihna sang zawk neih erawh ka duh' ti chungin PSG tan a khel zui.

Montpellier an sawp ṭumin Mbappe hi hun tawp hma minute 20 vel a la awmah lakchhuah a ni a, khelmual a chhuahsan dawn hian coach Tuchel nen nasa taka an inhnial bakah a ṭhutna a pan hnuah pawh a lungawi lo hle tih a lang bawk.

French football journalist Laurens chuan, "Minute 68-na vela lakchhuah a nih khan chiang takin a lawm lo tih a lantir. Kum 21 mi a ni tawh a, World Cup champion a ni a,

champion nana player pawimawh a ni, player ropui Lionel Messi leh Cristiano Ronaldo te hnungzui thei turin theihna a nei bawk, khatianga thil tih kha chu a awm lo hran lo.

"Pathianni zing khan meeting an nei a, Mbappe hian a thil tih kha a dik lo tih thu sawi tawh mah se ngaihdam a dil hran lo. A ngaihdan chuan coach Tuchel khan kum 19 hnuai lam player enkawl danin a enkawl ni maiah a ngai. German manager erawhin an ṭhatna turin player a siksawi thu a sawi 

ve thung.

"Mbappe hian ram leh club tan a theih anga tam inkhelh char char a duh a, match an neih leh hmasak berah chuan a khel tluan chhunzawm nghal. League bakah Champions League khelh chhunzawm a awm leh dawn a, eng nge thleng zel chu a hriat theih dawn.

"Inhnialna leh ngaihdan chi hrang hrang a awm zel dawn, club lam hian coach Tuchel emaw forward Mbappe zawk emaw hi an thlan ngai ta ang se chuan, keichuan an thlan tur zawk chu ka hrilh kher che u ngai loin in hresa ang," a ti.

French champion PSG hian Pathianni zan dar 1:30 hian an elpui Lyon an mikhual dawn a, coach Tuchel-a'n engtiangin nge a naute a remkhawm dawn tih leh, star player Neymar a inlan dawn em tih chu mipui hriat chak a ni ang.