Halep a inhnukdawk

Simona Halep chu Palermo Ladies Open aṭangin a inhnukdawk. Inelna hmachhawn turin hming pe lut vek tawh mah se Italy rama khualzin inkaihhruaina dan zawm a harsat avangin a inlan thei leh dawn ta lo.

Tun hnaiah Italy chuan khualzin enkawl dan thar a siam a, Covid-19 darh zel vangin Romania leh Bulgaria aṭanga zinte chu Italy an thlen aṭanga ni 14 chhung khunghran hmasak tur an ni - Halep hi Romania ram mi a ni. World number 2 Halep chuan, "Romania ramah hri a darh ve mek a, rilru lam pawh a nghawng hle. Tun dinhmunah chuan thlawhtheihna hmanga zin turin ka inpeih lo. Tournament buatsaihtu leh buaipuitu zawng zawng chungah thupha ka chawi bawk," a ti.

Palermo Open hi August thlaah khelh a ni dawn, ram dang aṭanga player inlan turte chu an zin luh hmain hripui an kai em tih enfiah a ni dawn; Italy an thlen hnuah endik leh an ni bawk ang. Tournament director Oliviero Palma chuan, "WTA lamin inkahhruaina dan a siam a, chumi behchhan chuan keini lam pawhin player an him theih nan ruahmanna kan siam ve bawk. Mipui himna leh hriselna ngai pawimawh chungin inelna buatsaih kan tum," tiin a sawi.