Man United chak nan Rashford-a goal a tawk
Pathianni zan khan Manchester United-in Marcus Rashford goal hmangin Old Trafford-ah West Ham 1-0 in an hneh. Manchester tlangval Rashford hian a inzirchhuahna club tan goal 100 a khungna chiah a ni bawk.
Erik Ten Hag hnuaiah Manchester United an insiamrem zel a, Dutch manager-in a ṭul dan ang zelin player a siksawi. Captain Harry Maguire pawhin August 13-a Brentford laka 4-0 a an mualpho hnuah Premier League-ah bul a ṭan a, Europa League-a goal khungtu Cristiano Ronaldo pawhin bul a ṭan.
Thawhhona ṭha leh goal
Sheriff Tiraspol laka ball virtu Antony-a chu hliam tenau vangin squad-ah dah a ni lo a, beisei anga khel thei lo Jadon Sancho chu bench-ah dah a ni bawk. Bul ṭantu zingah Ronaldo leh Anthony Elanga te an tel a, United player-te an thawhrim avangin West Ham player ball an chhuhsak nasa hle.
Mualneitu hian bul pawh an ṭan ṭha zawk a, Hammers tlarhnung tan Rashford chu hnawksak a tling. English forward Rashford hian a chance neih ṭhat hmasa tauh ṭha tawk lo mah se minute 38-naah Christian Eriksen erawh chiang zetin a tauh goal.
Kum 25 mi Rashford hi Man United tana goal 100 khung thei 22-na a ni a, Hammers laka a khelh dan thlirin England squad-a tel a phu. First half-ah Man United an chungnung a, an phu ang ngeiin 1-0 in hma an hruai bawk.
Spain duh loh De Gea
World Cup khel tur Spain probables squad-a tel pha lo David de Gea-a'n theihna sang tak a nei tih second half-ah a pholang. Hammers-in siphurh sut tumin an nawr na a, Michail Antonio ball pet ṭha zet chu De Gea-a'n a dang a, Kurt Zouma ball tauh chu Spanish keeper hian ṭha takin a dang leh bawk.
United pawhnin chance an nei ve tho a, Fred-a'n goal ban a tauh per. Amaherawhchu goal mamawh Hammers goal bawh a na hle. Jarrod Bowen-a'n a hun ṭha neih goal-ah a chantir thei lo a, Declan Rice-a goal khung tur ṭha takin De Gea-a'n a save sak leh bawk.
Premier League inkhel pawimawh a nih rualin World Cup khel tur zawnna a ni thei nghal. Luis Enrique-a'n thutlukna a siam sual a nih pawhin Euro 2020-a Real Madrid player tel loa khel ngam manager hian De Gea thlan loh hi a pawi a ti lo ang.
England lamah Declan Rice-a'n a dam a nih phawt chuan hmun a chang ngei dawn tih a chiang a, Jarrod Bowen leh bench-a hun hmang tluan Jadon Sacho ten Qatar-a zin turin hun tlem an la nei. Rashford leh Maguire tan kawng a inhawng a, chutihrualin Gareth Southgate-a thutlukna a pawimawh ang.
World Cup hma fixtures
Real Sociedad (EL) (Nov 3, Ningani): Europa League-ah group khata sang berin last 16 an lut nghal dawn a, pahnihna team-ten Champions League aṭanga tla thla team nen knockout playoff an khel ang. Man United tan pakhatna ni turin Real Sociedad hi goal hniha hneh a ngai dawn a, knockout playoff-a Barcelona, Sevilla leh team lian dangte pumpelhna tur a nih avangin goal hniha chak hi a pawimawh hle.
Aston Villa (EPL) (Nov 6, Pathianni): Steven Gerrard banin Aston Villa-in Unai Emery an lalut a, Spanish manager hnuaia an match hmasa ber tur chu Man United a ni. Villarreal hian Europa League final-ah United hi an hneh tawh a, Emery hian a hmachhawn tur team hi a hrechiang.
Aston Villa (EFL Cup) (Nov 10, Ningani zan): Man United-in Aston Villa match zawnin an khel dawn a, League Cup-ah an hmachhawn lehnghal dawn. Erik Ten Hag-a'n nomawi a duh a ni chuan League Cup hi ngaihthah thiang lo.
Fulham (EPL) (Nov 13, Pathianni): Fulham-in season an hmang chhe lo a, Man City zawha Man Utd an hmachhawn leh nghal tur erawh an vanduaiah a ngaih theih. Cottagers hi pasarihnaah an awm mek a, Man United tan World Cup chawlh rilru hahdam taka hmang turin hnuaia maia awm club hi an hneh a ṭul ang.