NE Zone team-ah Mizo pathum

India ram pum huap hmeichhe cricket inelna a tel turin Mizo cricketer pathum thlan an ni a, Senior Women T20 Intra Zonal Tournament an khel ang.

North East Zone Women Team a khel tur hian Lalhriatpuii, Ramengmawii leh Lalrinfeli te thlan an ni a. November 8, Thawhlehni aṭanga November 16 chhungin an khel ang.

Mizo player-te bakah hian Cricket Association of Mizoram a honorary Joint Secretary Joseph Lalhriatpuia chu team manager atana ruat a ni.

CAM Honorary Secre-tary Mamon Majumdar chuan, "India cricket-ah hriat kan hlawh ve tan zel tih a lang a, hei hi CAM hnathawh that lanna leh kan player-te hmasawnna nasa tak vang a ni.

"Hmeichhe cricket hi kum 2019 aṭang chauha kalpui tak tak tan a nih ngaihtuah chuan tuna Zonal Team a hmeichhe pathum thlan an ni hi kan tan thil ropui tak a ni. Kan player-ten hetiang dinhmun an thlen theihna tura rim taka thawhpuitu coach te leh midangte zawng zawngte chungah pawh lawmthu ka sawi."

"Tun aṭanga kum hnih thum chhungin kan player-te hi India Women Team atana enthlak zingah an tel ngei ka beisei a, IPL franchise-te pawhin an ngaihven zingah an tel theih ngei ka ring." tiin a sawi.