FIFA U-17 Women's World Cup Spain aia thiam zawk an awm lo

Kum 17 hnuai lam hmeichhia, football hmanga inelna ropui FIFA Under-17 Women's World Cup final chu Pathianni zan khan khelh a ni ta a, Spain chuan 1-0 a Colombia hnehin an champion.

DY Patil Stadium, Navi Mumbai-a fans 24,000 chuang pungkhawm hmaah Colombian defender Ana Guzmán chuan minute 82-naah an lamah a tilut a, hun tawp thlenga goal dang lut loin champion lai Spain an chak.

Spain tan Cristina chuan goal hmahruai a khungah inngai mah se, video assistant referee hmanga ennawn a nih hnuah Cristina hian a kutin ball a tawk fuh hmasa niin a lang a, pawm a ni lo.

Mahse, hun tawp nan minute riat chiah a awm tawh tihah Spain-in goal an khung leh ta tho a, 1-0 a hnehna changin an champion - kum 2018 khan an champion tawh a, a zawnin an champion tihna a ni!

Pathianni zana team pahnih intawn hmain pathumna inchuhin Nigeria leh Germany an intawng a, hun pangngaia 3-3 a an inhnehtawk hnuah penalty hmangin Nigeria hian 3-2 in hnehna an chang.

Nigeria hian Opeyemi Ajakaye, Amina Bello leh Edidiong Etim hmanga goal khungin, 3-0 in hma an hruai hman a, mahse, Germany-in Jella Veit, Paulina Bartz leh Loreen Bender hmanga sutin, 3-3 a ni zui!

A tawpah erawh Germany tana penalty pettu pahnih chiahin an chhuih goal avangin, Nigeria an vannei leh ta tho a, pathumna lawmman nen India an hawsan.

October 30, Pathianni
Pathumna zawnna
Nigeria 3 - 3 Germany
NIG: Opeyemi Ajakaye 20'; Amina Bello 48'; Edidiong Etim 63'
GER: Jella Veit 73'; Paulina Bartz 85'; Loreen Bender 90'
*Penalty-ah 3-2 in Nigeria an chak
Final
Colombia 0 - 1 Spain
SPA: Ana Guzmán 82' (OG)