Champions League Tute nge tlang tawh?
European football-a club inelna ngaihhlut hlawh ber, Champions League group stage chu tun karah khelh zawh a ni dawn ta a, team 12 zetin last 16 an lut tawh a, hmun ruak pali a la awm.
Mizote ngaihven Premier League club zingah Manchester City, Chelsea leh Liverpool te an tlang tawh a, hetihlai hian Tottenham Hotspur dinhmun a la chiang lo thung.
Spanish club zingah Real Madrid chu last 16 lut awmchhun an ni a, Barcelona, Atletico Madrid leh Sevilla ten match khat ṭheuh khelh tur la nei mah se European football-a club inelna sang berah beisei tur an nei tawh lo.
Champions League-ah hian point hmuh zat a inang chuan head-to-head en ṭhin a ni a, an la intluk cheu chuan goal difference en tur a ni.
Group A
Napoli leh Liverpool-ten last 16 an lut chiang tawh a, mahse, Reds tan group hmahruaitu ni chunga last 16 lut tur chuan si li fai tala Napoli hneh a ngai. Rangers leh Ajax tan Europa League chu beisei tur a ni a, Scottish club tan Europa League khel turin goal nga tala Ajax hneh a ngai dawn.
Group B
Club Brugge leh Porto ten last 16 an lut tawh a, zaninah Club Brugge an chak chuan hmahruaitu ni chungin last 16 an lut dawn a, Atletico leh Porto inkhel result-in awmzia a nei lo ang. Atletico tan Europa League khel turin Leverkusen laka point hlawhchhuah a ngai dawn thung.
Group C
Hmahruaitu ni chungin Bayern Munich an tlang chiang a, Inter Milan-in an zui. Barcelona-in Europa League an khel ang.
Group D
Team paliin beisei an la nei vek - Spurs tan Marseille lakah point hlawhchhuah a tawk a, Marseille tan chak a ngai thung. Sporting Lisbon leh Eintracht Frankfurt inkhela chak zawk an lut dawn bawk a, Spurs an chak chuan Sporting tan draw a tawk.
Group E
Hmahruaitu ni chungin Chelsea an tlang tawh a, AC Milan-in Red Bull Salzburg lakah point an hlawhchhuah theih chuan Blues hnung an zui ang.
Group F
Real Madrid an tlang tawh a, Celtic an hneh chuan hmahruaitu ni chungin last 16 an lut ang. RB Leipzig tan tlang turin Shakhtar Donetsk lakah draw a tawk a, Ukrainian club tan chak a ngai thung.
Group G
Manchester City chu group hmahruaitu ni chungin an tlang chiang a, Borussia Dortmund an tlang bawk. Sevilla-in Europa League an khel ang.
Group H
Paris St-Germain leh Benfica an tlang tawh a, an match hnuhnung berah an chak ve ve chuan, head-to-head a an intluk avangin goal difference-a ṭha zawk PSG chu hmahruaitu ni chungin an tlang ang.
Mahse, Benfica hian Maccabi Haifa an tum dawn avangin goal difference hi a danglam ve leh thei - Juventus leh Maccabi beisei chu Europa League a ni.