Barca lawm nan Girona-in Real an chelh

Pathianni zan La Liga inkhelah Real Madrid an chak zo lo a, Santiago Bernabeu-ah inlan mah se club tenau Girona nen 1-1 in an inhnehtawk - point khatah lungawi an zir a ṭul.

Real Madrid tan Vinícius Júnior chuan goal hmahruai khung mah se Girona tan Cristhian Stuani chuan penalty hmangin si phurh a sut a, hun tawp thlenga goal dang a luh tawh loh avangin team pahnih an inhnehtawk.

Spanish champion-in hnehna chang zo lo mah se table chung ber an luah chhunzawm zel a, mahse, an hnuai chiaha awm Barcelona aia an sanna chu point khat chiah a ni ta - La Liga nomawi inchuh a ngaihnawm zel dawn.

Real lawm lohna belhchhah turin Toni Kroos chu hun pek belhah hnawhchhuah a ni a, German midfielder tan a career-a red card a hmuh hmasak ber a ni.

Inkhel hmuhnawm
Santiago Bernabeu-a inkhel an nih bawk avangin Real Madrid tan awlsam taka hnehna channa tur nia ngaih a ni a, mahse, an beisei ang ngawtin Real tan a awlsam lo - first half chhungin goal an khung lo.

Minute 70-naah erawh Vinicius a inlar a, Brazilian forward hian Federico Valverde siamsak chu goal ruakah a tlawh lut a, hun a tlem tawh avangin Girona an 'comeback' a rinawm tawh lo.

Mahse, minute 10 a liam a, beisei loh takin Girona lamin goal khungna chance an nei. Marco Asensio-a'n a kutin ball a tawk fuh a, referee-in video assistant referee a rawn hnuah penalty spot a kawk.

Bench aṭanga lut hlim Stuani a lo pen chhuak a, a ball tawh hmasak ber chu Real laka si phurh sut nan a hmang - Thibaut Courtois a bum chiang hle. Kum 36 mi striker hi kum 1960 hnua Bernabeu-a Real laka La Liga goal khung thei upa ber a ni.

A tawk!
Real Madrid tan hliam vangin striker chhuanvawr Karim Benzema a la inlan thei lo a, Ballon d'Or dawng hlim striker tel loin Real tlarhma a hriam tawk lo - inhnehtawk hi team pahnih khelh dan enin, result awm reng a ni, a tih ngam.

Spanish champion tan Rodrygo vanneih zan a ni lo; 1-1 a nih hnu, minute 89-naah Brazilian forward hian chakna goal a khungah a inngai a, mahse, Paulo Gazzaniga-a'n a shot a dan per, a tlawh zui leh chu Girona keeper hian a kutin a chelh hmanah ngaih a ni a, pawm a ni lo.

Hei chauh a ni lo - first half-ah kum 21 mi forward hian goal khung theihna remchang a nei a, mahse, a chance neih duhawm tak chu post pet per nan a hmang.

Girona lam hian chance nei lo an ni bik lo - Venezuelan defensive midfielder Yangel Herrera chuan bar hnuai lam chu uiawm zetin a pet per a, goal ngat se goal ropui zinga chhiar tel tlak a ni.